Республика ихтисослаштирилган она ва бола саломатлиги илмий-амалий маркази Жиззах филиалида чақалоқни ўғирлаган аёл ушланди. Бу ҳақда вилоят ИИБ матбуот хизмати хабар берди.
Маълум қилинишича, Зафаробод тумани Ёрқин шаҳарчасида яшовчи аёл 28 январь куни Республика ихтисослаштирилган она ва бола саломатлиги илмий-амалий маркази Жиззах филиалида ўғил фарзандни дунёга келтирган. 31 январь куни тахминан кечги соат 19:30 ларда 25-30 ёшлардаги юзига тиббий ниқоб таққан нотаниш аёл жабрланувчининг хонасига кириб, “болангизни шифокор кўригига олиб бораман” деб, чақалоқни олиб кетиб қайтиб келмаган.
Олиб кетилган чақалоқ шу куннинг ўзида ички ишлар органлари ходимлари томонидан олиб борилган тадбирлар давомида топилган. Ушбу чақалоқни олиб кетган шахс процессуал тартибда қўлга олинган.
Республика ихтисослаштирилган она ва бола саломатлиги илмий-амалий маркази Жиззах филиали шифокорининг “Миллар” дастурига маълум қилишича, боласи ўғирланган аёл эгизак фарзанд — икки ўғилни дунёга келтирган бўлган. Ўғирланган чақалоқ онасининг бағрига, эгизагининг ёнига соғ-саломат қайтарилган.
Ҳолат юзасидан Жиноят кодексининг 137-моддаси (одам ўғрилаш) билан жиноят иши қўзғатилган.
Изоҳ (0)