Toshkent shahar Jinoyat ishlari bo‘yicha Sergeli tuman sudi styuardessaga shilqimlik qilgan fuqaro ishini ko‘rib chiqdi. 39 yoshli sudlanuvchiga qilmishi uchun 5 sutka maʼmuriy qamoq jazosini tayinladi.
Sud kecha, 2025-yilning 7-yanvar kuni bo‘lib o‘tdi.
Sud hujjatida keltirilishicha, 2024-yil 31-dekabr kuni Sochi—Toshkent yo‘nalishi bo‘yicha O‘zbekistonga uchib kelayotgan 39 yoshli erkak samolyot bortida mast holatda Uzbekistan Airways aviakompaniyasining 23 yoshli xodimi, bort kuzatuvchisi bo‘lgan qiz tanasining yonboshini bir necha marotaba ushlab, unga nisbatan shahvoniy shilqimlik qilgan.
Sud majlisida so‘z olgan sudlanuvchi samolyot bortida qo‘lidagi narsa polga tushib ketgani uchun o‘sha narsani olish maqsadida polga egilganini, shu paytda qo‘li bexosdan yonidan o‘tib ketayotgan bort kuzatuvchisiga tegib ketganini, shilqimlik qilmaganini, bunday holat boshqa qaytarilmasligini va unga yengillik berishni so‘ragan.
Sudda so‘roq qilingan Uzbekistan Airways aviakompaniyasi xodimi esa o‘sha kuni Sochi—Toshkent yo‘nalishi bilan uchib kelayotgan reysdagi yo‘lovchilarga xizmat ko‘rsatayotganida shu yo‘lovchi mast holda bir necha marotaba uning yonboshiga qo‘li bilan teginib, shilqimlik qilganini, u yo‘lovchiga bunday harakatlarini to‘xtatishni so‘rab tanbeh berganligini, erkak esa harakatlarini to‘xtatmaganligini shuningdek, unga qo‘pol muomalada bo‘lishda davom etganini aytib, suddan sudlanuvchiga qonuniy chora ko‘rishni so‘ragan.
Sud 39 yoshli erkakni Maʼmuriy javobgarlik to‘g‘risidagi kodeksning 41-1-moddasining 1-qismida nazarda tutilgan huquqbuzarlikni (shahvoniy shilqimlik qilish, yaʼni shaxsga nisbatan uning uchun nomaqbul bo‘lgan hamda uning shaʼni va qadr-qimmatini tahqirlaydigan, shaxsning tashqi qiyofasini yoki qaddi-qomatini tavsiflashda, imo-ishora qilishda, teginishda, chaqirishda ifodalangan, shahvoniy xususiyatga ega bo‘lgan harakatlarni bir marta qo‘pol ravishda yoki bir necha marta sodir etish) sodir etganlikda aybli deb topdi va 5 sutka maʼmuriy qamoq jazosini tayinladi.
Izoh (0)