Microsoft asoschisi va milliarder Bill Geyts keyingi yigirma yil ichida o‘z boyligining 99 foizini xayriya ishlariga sarflashga qaror qilganini e’lon qildi. Bu haqda u o‘zining veb-saytida ma’lum qilgan.
“Vafotimdan so‘ng, men haqimda turli gaplar aytilishi mumkin. Lekin men haqimda “u boy bo‘lib o‘ldi”, degan gapni aytilmasligiga qat’iy azm qilganman”, deydi Bill Geyts.
U shu bilan birga amerikalik magnat va xayriyachi Endryu Karnegining “boy bo‘lib o‘lgan odam sharmanda bo‘lib o‘ladi”, degan so‘zlarini keltirgan.
Ma’lumotlarga ko‘ra, Geyts o‘z pulining 99 foizini tarqatsa ham, baribir milliarder bo‘lib qoladi. U o‘z qarori haqidagi matnda hozirda uning boyligi 108 milliard dollarga baholanayotganini ko‘rsatuvchi grafikni joylashtirgan.
Geytslar jamg‘armasi (Bill va Melinda Geyts jamg‘armasi) uzoq vaqtdan beri sog‘liqni saqlash va boshqa sohalardagi loyihalarni moliyalashtirib kelmoqda.
Microsoft asoschisining tushuntirishicha, u xarajatlarni tezlashtirishga qaror qilgan: ilgari u rafiqasi bilan jamg‘arma ular vafotidan keyin o‘nlab yillar davomida ishlashini rejalashtirgan bo‘lsa, endi jamg‘arma barcha mablag‘larni tarqatib, 2045-yilda faoliyatini yakunlashini qaror qilgan.
Bill Geyts bu yil kuzda o‘zining 70 yoshini qarshilaydi.
Milliarderning hisob-kitoblariga ko‘ra, 20 yil ichida uning jamg‘armasi taxminan 200 milliard dollar sarflaydi va yakuniy summa bozor holati va inflyatsiyaga bog‘liq bo‘ladi. 25 yillik faoliyati davomida Geytslar jamg‘armasi allaqachon turli mamlakatlarda sog‘liqni saqlash va rivojlanish uchun 100 milliard ajratgan.
“Kelgusi yigirma yil ichida jamg‘arma uchta asosiy maqsadni ko‘zlaydi. Oldini olish mumkin bo‘lgan, ammo hali ham onalar va bolalar o‘limiga sabab bo‘layotgan kasalliklarni bartaraf etish, bezgak va qizamiq kabi yuqumli kasalliklar ustidan g‘alaba qozonish, hamda turli mamlakatlardagi yuz millionlab aholini qashshoqlikdan qutqarish”, deydi u o‘z bayonotida.
BBC’ga bergan intervyusida bu qarorga nima sabab bo‘lgani haqidagi savolga javoban Geyts yigirma yildan so‘ng dunyoda boshqa boy odamlar paydo bo‘lishini va ular odamlarga muammolarni hal qilishda qanday yordam berishni yaxshiroq tushunishini aytgan.
“Bu yerda gap shoshilinchlikda. Agar abadiy yashamoqchi bo‘lmasak, ko‘proq mablag‘ sarflashimiz mumkin va bu xarajatlar mening qadriyatlarimga mos kelishini bilaman”, dedi Geyts.
Bill Geyts va Pol Allen 1975-yilda Microsoft kompaniyasiga asos solgan. Bu yil kompyuter va axborot texnologiyalari olamidagi bu gigant yarim asrga to‘ladi. Geytsning o‘zi 2000-yilda kompaniya bosh direktori lavozimidan, 2014-yilda boshqaruv raisi lavozimidan, 2020-yilda esa direktorlar kengashidan ketgan.
Izoh (0)