Ko‘p pulga ega bo‘lish faqat qimmat restoranlarda ovqatlanish va nihoyatda sog‘lom parhezga rioya qilish kerak, degani emas. Ba’zi ishbilarmonlar qat’iy parhezlarni sinab ko‘rsa, boshqalari esa chizburgerlarni yoki ayrimlari yakshanba kunlari quymoq tayyorlashni xush ko‘radi.
Dunyoning eng boy odamlari qanday taomlarni tanovul qiladi? Business Insider jurnalistlari shu savolni berib, milliarderlarning qanday ovqatlanish odatlari borligini aniqladilar. Ro‘yxatda Richard Branson va Jek Dorsidan tortib, Uorren Baffet va Ilon Mask ham bor.
Richard Branson, Virgin Group asoschisi
Branson qora choysiz yashay olmasligini aytib, kuniga o‘rtacha 20 piyola choy ichadi. “Men English breakfast choyisiz qanday yashagan ekanman, bilmayman”, degan edi u 2016-yilda Daily Mail nashriga.
Virgin Group asoschisi odatda kunini mevali salat va myussli bilan boshlaydi, lekin vaqti-vaqti bilan uning o‘rniga baliq iste’mol qiladi. Uning so‘zlariga ko‘ra, suhbatdoshlarining “ko‘nglini ko‘tarish” uchun ish bilan bog‘liq uchrashuvlarni tushlik vaqtiga belgilashni ma’qul ko‘radi. Kechki ovqat vaqtida tadbirkor odamlarni “hikoyalarni baham ko‘rish va g‘oyalarni topish” uchun birlashtirishni yaxshi ko‘radi.
Shuningdek, u oilasi bilan muloqot qilish uchun doim vaqt topishini, muntazam ravishda jismoniy mashqlar bajarishini, kechki soat 23:00 lar atrofida va taxminan olti soat uxlashini qo‘shimcha qilgan.
Jeff Bezos, Amazon kompaniyasi asoschisi
Bezos shoshmasdan, foydali nonushta qilishni yaxshi ko‘rishini aytgan bo‘lsa ham, kunni ekzotik taom bilan boshlashga qarshilik qilmasligini ma’lum qildi.
Bir kuni ertalabki yig‘ilish paytida tadbirkor sakkizoyoq bilan kartoshka, sarimsoq va qaynatilgan tuxum buyurtma qildi. Keyin Bezos bu taomni hech qachon tatib ko‘rmaganini, shuning uchun shu yo‘l bilan nonushtaga sakkizoyoq yeyishga qaror qilganini ta’kidlagan.
Uning sevgilisi Loren Sanches The Wall Street Journal nashriga Bezos hech qachon shaxsiy murabbiyi bilan mashg‘ulotlarni o‘tkazib yubormasligini va har yakshanba kuni ertalab quymoq pishirishini aytgan.
— Har safar u Betti Krokerning retseptlar kitobini chiqaradi va men unga “Sen dunyodagi eng aqlli odam bo‘lsang, nega bu retseptni haligacha yodlab olmading?” deb so‘raganman, — deydi u.
Bill Geyts, Microsoft asoschisi
Bill Geyts Diet Cola’ni juda yaxshi ko‘rishini, uni kuniga 3-4 marta ichishini aytadi. Oshpaz Jordi Kruz bir paytlar Geyts butun bir restoranni ikki kunga band qilganini, lekin faqat Diet Cola buyurtma qilganini ma’lum qilgan.
Geyts ertalablari Cocoa Puffs’ni iste’mol qiladi. Tadbirkorning sobiq rafiqasi Melindaga ko‘ra, Geyts odatda nonushtani o‘tkazib yuboradi. Milliarder chizburgerlarni ham ishtaha bilan yeydi.
Netflix hujjatli filmlarining birida Geyts eriydigan kukunli ichimlik — Tang’ni juda yaxshi ko‘rishini aytadi.
Stiv Jobs (1955—2011), Apple asoschisi
Uolter Ayzeksonning tarjimayi holida yozilishicha, Jobs ba’zan haftalar mobaynida bir ovqatlanishda bitta yoki ikkita mahsulotni iste’mol qilgan. Bir vaqt uning taomnomasi faqat sabzi va olmadan iborat bo‘lsa, boshqa vaqt faqat meva, sabzavot, yong‘oq, don mahsulotlarini tanovul qilgan.
Jobs Ayzeksonga Rid kollejida o‘qiyotganda “go‘sht iste’mol qilmaslikka qaror qilganini” va keyinchalik sut mahsulotlarini ham to‘xtatganini aytgan.
Shuningdek, kitobda yozilishicha, Jobs ba’zan bir necha kun ma’lum vaqt davomida ovqat yemagan. Uning so‘zlariga ko‘ra, bu eyforiya tuyg‘usini keltirib chiqaradi.
2003-yilda Jobsga oshqozonosti bezi saratoni tashxisi qo‘yilganida, mevali parhez unga yordam berishiga ishongan, ammo 5 yildan keyin u taomnomasiga baliq va boshqa proteinli taomlarni kiritgan. Vafot etishidan avval asosan suyuq ovqatlar parheziga rioya qilgan.
Ilon Mask — Twitter, SpaceX, Tesla rahbari
“Agar ovqatlanmasam ham samarali ishlashim mumkin bo‘lganda, men umuman ovqat yemasdim”, deydi Ilon Mask.
Milliarder odatda nonushta qilmaydi. Ba’zan Mars batonchiklaridan yoki “ponchik” yeydi. Mask ish vaqtida tez ovqatlanadi — yordamchisi olib kelgan hamma narsani besh daqiqada yeb qo‘yadi.
Tadbirkor shakarni kamaytirishga qaror qilgan, ammo u nonushtaga shirinlik iste’mol qilish odatini o‘zgartirmagan. Chunki Twitter’da har kuni ertalab “ponchik”lar yeyishi haqida o‘rtoqlashdi. Va o‘tgan yili u Diet Cola bilan tushgan rasmini tvit qildi. Geyts singari Mask ham bu ichimlikni juda yaxshi ko‘radi. Ixtirochi 2007-yillarda bir vaqtning o‘zida kuniga bu ichimlikdan sakkiz dona ichgan.
2020-yilda Jo Roganga bergan intervyusida Mask mazali taomlardan voz kechishga tayyor emasligini tan olgan, garchi bu u kamroq yashashini anglatsa ham.
Biroq kechki ovqatni endi shoshilmay tanovul qilyapti. Mask barbekyu va fransuz oshxonasini yaxshi ko‘radi.
Mark Sukerberg, Meta rahbari
2011-yilda Sukerberg faqat o‘zi so‘ygan hayvonlar go‘shtini iste’mol qilishga qaror qildi.
Qayd etilishicha, uning ratsionida echki va tovuq go‘shti va dengiz qisqichbaqasi bor.
Uorren Baffet, Berkshire Hathaway bosh direktori
2015-yilda Uorren Baffet Fortune nashriga bergan intervyusida u “Coca-Cola’ning chorak qismi” ekanligini ta’kidlagan. Shuningdek, u kartoshka fri va muzqaymoqni yaxshi ko‘radi.
Keyin Baffet hazil bilan jurnalistga “olti yoshli bola kabi” ovqatlanayotganini, chunki ularda o‘lim darajasi pastligini qo‘shimcha qilgan.
Bill Geytsning aytishicha, Baffet asosan McDonald’s gamburgerlari va Oreo pechenyelarini xush ko‘rib yeydi.
Mavzuga doir:
Izoh (0)