Microsoft asoschilaridan biri, milliarder Bill Geytsning fikricha, sun’iy intellektning (Artificial intelligence — AI) rivojlanishi insoniyatga uch kunlik ish haftasiga erishish imkonini beradi. Bu haqda u Spotify’dagi “What now?” podkastiga bergan intervyusida aytib o‘tdi. Geytsning so‘zlarini Business Insider keltirdi.
Suhbat davomida podkast boshlovchisi va komik Trevor Noa sun’iy intellektning rivojlanishi ish o‘rinlarining qisqarishi xavfini tug‘diradimi, deb so‘radi. Bunga javoban Geyts kelajakda odamlarning “bu qadar ko‘p mehnat qilishiga zarurat qolmaydigan” vaqt kelishi mumkinligini aytdi. Uning taxminicha, butun dunyoda “oziq-ovqat va barcha boshqa narsalarni mashinalar ishlab chiqaradigan” bo‘ladi.
“Agar haftasiga atigi uch kun ishlash talab etiladigan jamiyat qura olsangiz, menimcha, bu yaxshi”, — dedi Geyts.
Business Insider ta’kidlaganidek, Geyts iyul oyida o‘z blogida AI rivojlanishi bilan ba’zi ishchilar qayta tayyorlovga muhtoj bo‘lishini, buni hukumatlar va kompaniyalar hal qilishi kerakligini aytgandi.
“Men sun’iy intellektning ta’siri sanoat inqilobi kabi ulkan bo‘ladi, deb o‘ylamayman, lekin bu, albatta, shaxsiy kompyuter yaratilishi voqeasidek katta bo‘ladi”, — degan o‘sha paytda Microsoft asoschisi.
Oktyabr oyida JPMorgan moliyaviy korporatsiyasi rahbari Jeymi Daymon ham sun’iy intellekt rivojlanishi bilan ish haftasining davomiyligi qisqarishini aytgandi.
“Farzandlaringiz 100 yoshgacha yashaydi, texnologiya tufayli saraton kasalligiga chalinmaydi va ular katta ehtimol bilan haftada uch yarim kun ishlaydi”, — degan u Bloomberg agentligiga bergan intervyusida.
Turli ijtimoiy so‘rovlar shuni ko‘rsatdiki, ko‘pchilik sun’iy intellekt tufayli ishdan bo‘shatilishi yoki maoshlari qisqartirilishidan qo‘rqmoqda. Xususan, Qo‘shma Shtatlarda so‘rovda qatnashgan ishchilarning 79 foizi AI tufayli maoshlari kamayib ketishidan xavotirdaligini aytgan.
Izoh (0)