AQSH va Ukraina prezidentlari Donald Tramp hamda Vladimir Zelenskiy 8-may kuni kechqurun telefon orqali muloqot qildi. Bu haqda Ukraina prezidenti o‘zining ijtimoiy tarmoqlardagi sahifalarida ma’lum qilgan.
Zelenskiyning aytishicha, suhbat davomida ular Oliy Rada AQSH bilan foydali qazilmalar bo‘yicha bitimni ratifikatsiya qilgani, shuningdek, “tinchlikka erishish uchun qo‘shimcha sa’y-harakatlar zarurligi” haqida fikr almashishgan.
Shuningdek, Zelenskiy Ukraina “bugundan boshlab” 30 kunlik o‘t ochishni to‘xtatishga tayyor ekanini va Rossiyaning bu taklifni qabul qilishini umid qilayotganini ta’kidlagan.
“Suhbat davomida Ukrainaning har qanday formatdagi muzokaralarga tayyorligini tasdiqladim. Biroq buning uchun Rossiya urushni tugatish niyatining jiddiyligini to‘liq va so‘zsiz o‘t ochishni to‘xtatishdan boshlashi orqali ko‘rsatishi lozim. Prezident Tramp bu urush tugashini xohlayotganini, yordam berishga tayyorligini va o‘t ochishni to‘xtatish zarurligini qo‘llab-quvvatlashini tasdiqladi”, deydi Zelenskiy.
Ukraina prezidentining fikricha, AQSH Rossiyani 30 kunlik sulhga ko‘ndira olishi mumkin.
“Rossiyaliklar o‘t ochishni to‘xtatishni qo‘llab-quvvatlashlari kerak. Ular urushni tugatishga tayyor ekanliklarini isbotlashlari lozim. O‘ttiz kun tinchlik yillarining boshlanishi bo‘lishi mumkin. O‘t ochishni to‘xtatishning o‘zi, uzoq muddatli va ishonchli bo‘lsa, tinchlikka tomon harakatning haqiqiy ko‘rsatkichi bo‘ladi. Amerika bu borada yordam berishi mumkin. Dunyo 80 yil avvalgidek Amerikaga muhtoj”, deydi Ukraina prezidenti.
AQSH prezidenti Donald Tramp o‘zining Truth Social ijtimoiy tarmog‘idagi sahifasida Rossiya va Ukraina bilan muzokaralar davom etayotganini yozgan.
“AQSH, eng yaxshi holatda, 30 kunlik so‘zsiz o‘t ochishni to‘xtatishni talab qilmoqda. Umid qilamizki, maqbul o‘t ochishni to‘xtatish rejimiga rioya qilinadi va har ikki davlat ushbu to‘g‘ridan-to‘g‘ri muzokaralar daxlsizligini ta’minlash uchun mas’ul bo‘ladi. Agar o‘t ochishni to‘xtatishga rioya qilinmasa, AQSH va uning hamkorlari qo‘shimcha sanksiyalar joriy etadi”, deydi Tramp.
Uning so‘zlariga ko‘ra, vaqtinchalik o‘t ochishni to‘xtatish pirovardida tinchlik bitimiga olib kelishi kerak.
AQSH prezidenti Donald Tramp turkiyalik hamkasbi Rajab Toyyib Erdo‘g‘onga murojaat qilib, Ukraina masalasida vositachilik qilishni so‘ragani, Erdo‘g‘on esa AQSHdan G‘azo sektorida otishmani to‘xtatishda ko‘maklashishni iltimos qilgani xabar qilingandi.
Aprel oyi oxirida Ukraina va AQSH birgalikda foydali qazilmalarni qazib olish va Ukrainani tiklash uchun investitsiya fondini tashkil etish to‘g‘risidagi bitimni imzolagandi.
Izoh (0)