AQSH Senati prezident Donald Trampning qudasi Charlz Kushnerni AQShning Fransiyadagi elchisi lavozimiga tasdiqladi. Bu haqda Politico nashrida xabar bermoqda.
Ma`lum qilinishicha, Charlz Kushner dushanba kuni Senat tomonidan AQShning Fransiyadagi elchisi etib tasdiqlangan. Bu, uning og‘ir jinoyatlari uchun sudlanganligi prezident afvi natijasida bekor qilinganiga qaramay yuz bergan.
Kushnerning o‘g‘li Jared Trampning birinchi prezidentlik muddatida uning katta maslahatchisi lavozimida ishlagan. U Trampning tashqi siyosatdagi eng muhim yutuqlaridan biri hisoblangan Isroil va bir qator arab davlatlari o‘rtasidagi Ibrohim kelishuvlarini imzolashga ko‘maklashgan.
Kushner lavozimga 51 ta “rozilik” va 45 ta “qarshi” ovoz bilan tayinlandi.
70 yoshli biznes-magnat Kushner Companies nomli xususiy ko‘chmas mulk kompaniyasining asoschisi bo‘lib, u shuningdek advokatlik bilan ham shug‘ullangan. Uning o‘g‘li Jared Kushner Trampning qizi Ivankaga uylangan.
2005-yilda Kushner soxta soliq deklaratsiyalarini topshirish, guvohlarga tazyiq o‘tkazish va Federal saylov komissiyasiga yolg‘on ma’lumot berish ayblovlari bo‘yicha o‘zini aybdor deb tan olgan. U ikki yil qamoqda o‘tirgan. 2020-yil dekabr oyida, birinchi muddati tugashidan sal oldin, Tramp uni afv etgan.
Donald Tramp 2024-yil dekabr oyida o‘z qudasi Charlz Kushner nomzodini AQShning Fransiyadagi elchisi lavozimiga tavsiya etgan edi. U Kushnerni mamlakatni munosib tarzda taqdim etadigan va uning manfaatlarini himoya qiladigan ajoyib biznes yetakchisi sifatida ta’riflagan.
Izoh (0)