Fransiyalik taksi haydovchilari mamlakat bo‘ylab bir qator shaharlarda tibbiy tashishlar uchun yangi tariflarni joriy etish rejalariga qarshi norozilik bildirib, yo‘llarda harakatlanishni qiyinlashtirdi. Bu haqda France Bleu radiostansiyasi xabar berdi.
“Bugun dushanba kuni ertalabdan butun mamlakat bo‘ylab ko‘plab “shilliqqurt operatsiyalari” (yo‘lda ataylab sekin harakatlanish) o‘tkazilmoqda. Taksi haydovchilari tibbiy tashishlarning yangi qoidalariga norozilik bildirish maqsadida ish tashlayapti va namoyishlar uyushtirmoqda”, deya xabar qildi radio.
Parij shahrida yuzlab taksilar A6, A13 avtomagistrallari va RN 12 milliy yo‘lida transport harakatini ataylab sekinlashtirgan.
Ma’lum qilinishicha, shahar chekkasidan kelgan taksi haydovchilari kortejlari Parijdagi Transport vazirligiga yo‘l olgan.
Shuningdek, taksi haydovchilari Tur shahridagi tibbiyot muassasalari oldida ham norozilik namoyishlari o‘tkazmoqda. Nant shahriga mintaqadan 200 dan ortiq taksi haydovchisi yig‘ilib, tashqi halqa yo‘lida harakatni to‘xtatib qo‘ygan. Transport harakatidagi qiyinchiliklar Strasburgda ham kuzatilmoqda, janubiy Marsel va Tulon shaharlaridagi norozilik namoyishlari tufayli yo‘llarda harakatlanish juda qiyinlashgan.
Shuningdek, Tuluza, Grenobl, Avinon, Perpinyan, Po, Kan va Dijon shaharlarida ham yuzlab taksi haydovchilari ishtirokidagi shunga o‘xshash norozilik namoyishlari o‘tkazilmoqda.
Parijdagi norozilik namoyishlari paytida talabalar aksiyasi ishtirokchilari AQSH bayrog‘ini yirtib, AQSH prezidenti Donald Tramp va uning tarif siyosatiga qarshi shiorlar aytishdi.
Izoh (0)