Xitoyda davlat va partiya xodimlarining xulq-atvoriga qo‘yiladigan talablar kuchaytirildi. Xususan, ish vaqtidagi tushliklar paytida tansiq taomlar tanovul qilish va spirtli ichimliklar ichish man etildi. Qaror matni Davlat kengashining rasmiy veb-saytida e’lon qilindi.
Xitoy Kommunistik partiyasi markaziy qo‘mitasi va XXR Davlat kengashi partiya va davlat muassasalarida qat’iy tejamkorlik va isrofgarchilikka qarshi kurashish to‘g‘risida qaror qabul qilgan. 18-may kuni eʼlon qilingan hujjatda jami 63 ta band mavjud bo‘lib, ular amaldorlarning xizmat safarlari, rasmiy qabullar, xizmat transport vositalari, anjumanlar va tadbirlar o‘tkazish, ofis xonalari va tejamkorlik muammosiga oid boshqa masalalarga doir xulq-atvor qoidalarini tavsiflaydi.
“Ish joyidagi tushlik paytida nozik taomlar tortilmasligi, sigaret va spirtli ichimliklar berilmasligi kerak”, deyiladi bandlardan birida.
Shuningdek, yangi qoidalar davlat va partiya xodimlarining xorijiy xizmat safarlariga oid xatti-harakatlarini batafsil tartibga soladi. Xususan, amaldorlarga aniq mazmun va maqsadga ega bo‘lmagan xizmat safarlarini tashkil etish, shuningdek, “niqoblangan turizm”ning har qanday shakli qat’iyan taqiqlandi.
Xizmat safariga jo‘nayotgan amaldorlarga qabul qiluvchi tomonga odatiy rasmiy tadbirlardan tashqari iltimoslar bilan murojaat qilish, shuningdek, pul sovg‘alari, esdalik sovg‘alari, mahalliy noyob taomlarni qabul qilish taqiqlandi. Xorijda qimor o‘yinlarida ishtirok etish taqiqlangani alohida ta’kidlangan.
Qarorda Xitoyda xorijiy mehmonlarni qabul qilish qoidalari ham bayon etilgan. Xususan, xorijiy mehmonlarni qabul qilish diplomatik, do‘stona tenglik, pragmatizm va tejamkorlik tamoyillari asosida amalga oshirilishi qayd etilgan. Qabul qiluvchi tomon, hujjatda ta’kidlanganidek, “xorijiy mehmonlar guruhlarini qabul qilish xarajatlarini qat’iy nazorat qilishi” lozim.
Ta’kidlanishicha, mamlakatning barcha hududlaridagi va barcha darajadagi ma’muriy organlar isrofgarchilik uyat, tejamkorlik esa qadr-qimmat va sharaf hisoblangan muhitni puxta targ‘ib qilishlari zarur.
Izoh (0)