Украинадаги тинчликпарварлик миссиясида иштирок этиш учун 30 дан ортиқ давлат ўз ҳарбийларини юборишга тайёрлигини билдирди. Бу ҳақда Буюк Британия бош вазири вакили Кира Стармер маълум қилди.
Иштирок этиш имкониятлари турлича бўлади, бироқ бу катта кучлар бўлади, катта миқдордаги давлатлар қўшин тақдим этади, янада кўпроқ давлатлар бошқа йўллар билан ўз ҳиссасини қўшади, деди у.
Ғарбнинг 26 мамлакати раҳбарлари, Европа иттифоқининг икки юқори мартабали вакили ва НАТО бош котиби Марк Рютте 15 март куни тинчликпарвар кучлар юборишни хоҳловчилар билан учрашув ўтказди. Буюк Британия ва Франция аллақачон бунга розилик билдирган. Украина президенти Владимир Зеленский аввалроқ Россия билан 30 кунлик муддатга ўт очишни тўхтатиш бўйича келишув тузишга тайёр эканини айтганди.
Россия Украинада НАТО аскарларини жойлаштиришга рози эмас
Россия НАТО давлатлари аскарларининг Украинада жойлаштирилишига рози бўлмаслигини бир неча бор таъкидлаган. Россия ташқи ишлар вазири ўринбосари Александр Грушко “Известия” нашрига берган интервьюсида буни қайта тасдиқлади. У ўт очиш тўхтатилганда НАТО ва Европа иттифоқи давлатларидан Украинага тинчликпарвар контингент юборилиши “ўринсиз ва бемаъни” деб ҳисобланишини билдирди.
Россия учун НАТО контингентлари Украина ҳудудида қандай ном остида жойлаштирилиши — Европа иттифоқи, НАТО ёки миллий сифатида бўлиши — мутлақо аҳамиятсиз. Агар улар у ерда пайдо бўлса, бу уларнинг можаро зонасига жойлаштирилганини ва ушбу контингентлар учун можаро томони сифатида барча оқибатларни келтириб чиқаришини англатади, дея таъкидлади Грушко.
Стармернинг вакили Россия томонидан ўт очилган тақдирда тинчликпарвар контингентга ўқ узишга рухсат бериладими, деган саволга шундай жавоб берди:
Эслатиб ўтиш жоизки, Россия қўшинларини киритаётганда Украинадан сўрамаган эди. Биз тезкор режалаштириш бўйича йиғилишлар ўтказмоқдамиз, деб қўшимча қилди у.
Амалдор, АҚШ 20 март куни эҳтимолий коалиция мамлакатлари мудофаа идоралари раҳбарларининг муҳокамаларида иштирок этадими ёки йўқми, ҳозирча аниқ эмаслигини айтди. Буюк Британия “америкалик ҳамкасбларимиз билан мунтазам музокаралар олиб бормоқда”, деди у.
Кир Стармер коалицияни қўллаб-қувватлаш бўйича ҳар қандай таклифдан мамнун бўлишини таъкидлади. AFP агентлиги хабар беришича, бир қатор давлатлар моддий-техник ёрдам кўрсатиши ёки разведка маълумотларини тақдим этиши мумкин. Шунингдек, давлатлар ўз аэродромларидан фойдаланишга рухсат бериши ёки тинчликпарварларни турар жой билан таъминлаши мумкин.
Макрон Украинага қўшин юбориш Путин билан муҳокама қилинмаслигини айтди
Путин ўз ҳудудига Шимолий Корея аскарларини олиб келганида, Украина президентидан бунга рухсат сўрадими? Йўқ, сўрамади. Хўш, унда нима учун Европа тинчликпарвар кучларини Украинага киритиш масаласини Путин билан муҳокама қилиш ва келишиб олиш керак экан?, деган Франция президенти.
Изоҳ (0)