Навоий вилоятининг Нурота туманидаги айрим боғчаларда гўшт истеъмолга яроқсизлиги аниқланди. Бу ҳақда Истеъмолчилар ҳуқуқларини ҳимоя қилиш жамиятлари федерацияси хабар берди.
Маълум қилинишича, тумандаги мактаб ва боғчаларда ўқувчи ҳамда тарбияланувчиларнинг соғлом овқатланишини ташкил этиш ҳолати жамоатчилик назорати тартибида ўрганилган. Жараёнда қатор камчиликларга дуч келинган.
Жумладан, ўрганишлар натижасида айрим мактабгача таълим муассасаларида болалар учун ажратилган озиқ-овқат маҳсулотларининг сақланиш қоидаларига риоя қилинмаётгани кузатилган. Баъзи боғчаларда эса гўшт маҳсулотларининг 4/1 қисми яроқсиз ҳолатда экани қайд этилган.
-ty4oHDsf.avif)
Федерация тумандаги айнан қайси боғчаларда бундай ҳолат қайд этилганига аниқлик киритмаган. Ўрганиш ишлари давом этаётгани, унинг якунлари ва аниқланган камчиликлар бўйича тегишли ташкилотларга маълумот тақдим этилиши билдирилган.
Навоий вилояти ҳокими Нормат Турсунов февраль охирларида давлат мактабгача таълим ташкилотларида баркамол авлодни тарбиялаш йўналишидаги устувор вазифалар муҳокамасига бағишланган танқидий-таҳлилий йиғилишда боғчалардаги камчиликларга тўхталиб, 1 кун муддатда масъуллардан “ҳалоллик ва виждон билан ишлаш” қасамёд хатини ёздириб олиш топшириғини берганди.
Боғчаларда озиқ-овқат бўйича аниқланган муаммолар
2023 йилнинг сентябрида Самарқанддаги боғчада болалар овқатидан гўшт кам чиққанди. “Боғча қозонига солиниши керак бўлган 12 кило гўшт чўмичга чиқмади” сарлавҳали видеолавҳа ижтимоий тармоқларда тарқалганди. Вилоят Мактабгача ва мактаб таълими бошқармаси болаларнинг ҳаққига хиёнатни кечириб бўлмас ҳолат деб атаганди.
2024 йилнинг бошларида Бухоро шаҳридаги боғчада болаларга берилиши керак бўлган озиқ-овқат маҳсулотлари талон-торож қилинганди. Текширув давомида тарбияланувчиларга берилиши керак бўлган 12 килограмм пиширилган гўшт ва 4 килограмм балиқ маҳсулоти ошпазлар ювиниш хонасидаги ваннада яшириб қўйилгани аниқланган. Ошпазларнинг шахсий буюмлари сақланадиган шкаф ва ташкилотнинг бўш турган хонасидан ҳам яшириб қўйилган озиқ-овқат маҳсулотлари топилган.
Ўша йилнинг июлида Бухоро вилоятининг Пешку туманидаги боғчада 150 нафар бола овқатига 300 грамм гўшт солингани аниқланганди.
Изоҳ (0)