“Боғча қозонига солиниши керак бўлган 12 кило гўшт чўмичга чиқмади” сарлавҳали видеолавҳа ижтимоий тармоқларда тарқалиб, кенг муҳокамаларга сабаб бўлганди. Самарқанд вилояти Мактабгача ва мактаб таълими бошқармаси ҳолатга муносабат билдирди.

Видеода Санитария-эпидемиологик осойишталик ва жамоат саломатлиги қўмитаси вилоят бошқармаси мутасаддиларининг вилоятнинг Қўшработ туманидаги 5-мактабгача таълим ташкилоти ошхонасини кўздан кечиргани акс этганди. Унда болалар овқатида солиниши керак бўлган гўшт кам чиққани танқид қилинган.

Вилоят Мактабгача ва мактаб таълими бошқармаси муносабатида айтилишича, бошқарма болаларнинг ҳаққига хиёнатни кечириб бўлмас ҳолат деб ҳисоблайди. Шу боис бу каби ҳолатларнинг олдини олиш мақсадида бошқарма ходимларидан иборат ишчи гуруҳи ҳам жойларда мунтазам ўрганишлар олиб боради ва аниқланган камчиликлар юзасидан тегишли тартибда чоралар қўллаб келинмоқда.

22 сентябрь куни вилоят Мактабгача ва мактаб таълими бошқармаси ишчи гуруҳи Қўшработ туманидаги 5-ДММТда ўрганишлар олиб бориш жараёнида Санитария-эпидемиологик осойишталик ва жамоат саломатлиги қўмитаси вилоят бошқармаси ишчи гуруҳи ҳам боғчадаги ҳолатни ўрганиш учун 5-ДММТга кириб келган.

Маълумотга кўра, ўша куни боғчага 110 нафар тарбияланувчи келган. Уларга СанПин нормаларига кўра, 80 граммдан гўшт берилиши, 10 граммдан пишлоқ берилиши белгилангани назарда тутилса, шу куни қозонга 110 нафар болага 12 кило эмас, 8 килограмм 800 грамм гўшт солиниши лозим бўлган. Шунингдек, ҳар бир болага 10 гарммдан жами 1 килограмм 100 грамм пишлоқ берилиши лозим бўлади. МТТнинг 22 сентябрь кунги таомномасида пишлоқ берилиши кўрсатилмаган.

22 сентябрь куни МТТда биринчи таомга мастава, иккинчисига чучвара тайёрлагани айтилган.

“Шу ўринда Санитария-эпидемиологик осойишталик ва жамоат саломатлиги қўмитаси вилоят бошқармаси ишчи гуруҳига боғчаларда болалар ҳаққига қилинаётган хиёнатни аниқлашдаги кўмаги учун вилоят Мактабгача ва мактаб таълими бошқармаси миннатдорлик билдиради.

Бироқ СЭО ва ЖСҚ вилоят мутасаддиларининг ўзлари қозонга мўралаётганда санитария-гегиена қоидаларига риоя этиб, махсус кийим-бошларда ошхонага кирсалар, мақсадга мувофиқ бўлар эди”, — дейилади муносабатда.

Қайд этилишича, бошқарма ишчи гуруҳи томонидан аниқланган камчиликлар бўйича мутасаддиларга чоралар кўриш бўйича ҳужжатлар тайёрланмоқда. Ҳолат юзасидан масъулларга кўрилган чоралар бўйича батафсил маълумот берилади.