Самарқанд шаҳрида 10 октябрь куни иккита мактабгача таълим ташкилотининг болалари овқатдан заҳарланиб, вилоят юқумли касалликлар шифохонасига ётқизилган.
Болаларнинг овқатдан заҳарланиши ҳолатлари 98- ва 106-мактабгача таълим ташкилотларида юз берган. «Дарё» мухбири Фарҳод Норбўтаевнинг хабар беришича, ҳар икки ташкилот озиқ-овқат таъминотида аутсорсинг хизматидан фойдаланиб келган.
Самарқанд вилояти мактабгача таълим бошқармаси бошлиғи ўринбосари Дилфуза Азизова болалар ҳақиқатан ҳам овқатдан оммавий заҳарланганини тасдиқлади.
«Жами 9 нафар бола шифохонага ётқизилган. 98-боғчадан 4 нафар, 106-боғчадан эса 5 нафар бола овқатдан заҳарланган. Ҳозирда Давлат санитария эпидимология назорати маркази заҳарланиш сабабларини ўрганмоқда», — дея маълум қилди Дилфуза Азизова.Маълумот учун, сўнгги бир ой давомида Ўзбекистонда овқатдан оммавий заҳарланиш ҳолатлари бир неча бор юз берди. Хусусан, 20 сентябрь куни Наманганда ўтказилган тўй маросимида 18 киши, 27 сентябрь куни Бекободдаги 15-мактабгача таълим ташкилотида 15 нафар бола, 30 сентябрь куни Андижондаги хусусий мактабда 82 нафар бола, 8 октябрь куни Андижондаги 35-мактабда 27 киши, хусусан, 24 нафар бола овқатдан заҳарланганиб, касалхонага ётқизилган.
Самарқанд вилоятининг ўзида эса охирги бир ой давомида камида икки марта шундай фавқулодда вазият кузатилди: 14 сентябрь куни бўлиб ўтган тўйдан сўнг 10 дан ортиқ одам шифохонага мурожаат қилган, 6 октябрь куни эса Самарқанд шаҳридаги хот-дог шохобчаларидан бирида овқатланган камида 24 киши эртаси куни касалхонага ётқизилган.
Изоҳ (0)