Туркия президенти Ражаб Тоййиб Эрдўғон Эгей денгизи ҳудудида тез-тез содир бўлаётган зилзилалар туфайли Истанбул ва мамлакатнинг бошқа вилоятларида юз бериши мумкин бўлган фавқулодда вазиятларга жиддий тайёргарлик кўришга чақирди.
Унинг айтишича, маҳаллий маъмуриятлар бу масалага тегишли эътибор қаратишлари ва шаҳар муҳитини ўзгартириш лойиҳалари орқали шаҳарларни эҳтимолий зилзилаларга тайёрлашлари зарур.
Эрдўғон “Туркия шаҳарларини, айниқса Истанбулни зилзилабардош қилишдан бошқа чора йўқ”лигини таъкидлади.
Аввалроқ муҳандис-геофизиклар палатасининг Измир бўлими раҳбари Синанджан Озичер Туркиянинг курорт минтақасида, айниқса Измирда вайрон қилувчи зилзила хавфи борлигини, бу шаҳар Истанбулга қараганда кўпроқ хавф остида эканлигини маълум қилган эди.
Озичернинг таъкидлашича, Измирдаги қалинлиги 120 метргача бўлган аллювиал грунт сейсмик тўлқинларнинг амплитудасини кучайтиради, бу эса биноларни янада заифлаштиради. Шунингдек, у минтақада 20—22 сония давом этадиган 6,9 балл кучидаги зилзила содир бўлиши мумкинлигини башорат қилмоқда.
Жорий йилнинг 22 январь куни Туркия қирғоқларида 5,0 магнитудали зилзила қайд этилди. Табиий офат маркази 243 мингга яқин аҳоли истиқомат қиладиган Маниса шаҳридан 135 км шимоли-ғарбда жойлашган.
Изоҳ (0)