Туркия президенти Ражаб Тоййиб Эрдўғон мамлакатдаги вайронкор зилзилалардан сўнг қутқарув ишлари кечиккани учун узр сўради, деб хабар бермоқда НTV турк телеканали.
Эрдўғон Туркиянинг жануби-шарқидаги зилзиладан энг кўп зарар кўрган Адияман вилоятига ташрифи чоғида зилзиладан жабр кўрганлар олдида узр сўраган.
“Зилзиланинг ҳалокатли таъсири ва ёмон об-ҳаво туфайли биринчи кунларда Адияманда кўнгилдагидек ишлай олмадик. Бунинг учун узр сўрайман”, — деди Эрдўғон.
Ушбу вилоятда 10 февралдаёқ маҳаллий аҳоли ҳукумат ҳаракатларидан норозилигини билдирганди.
“Зилзиланинг иккинчи куни соат 14:00 га қадар ҳеч кимни кўрмадим. На ҳукумат, на давлат, на полиция, на аскарлар. Уят! Бизни тақдир ҳукмига қолдирдингиз”, — деган ўшанда адияманлик Меҳмет Йилдирим.
Эслатиб ўтамиз, 6 февраль куни Туркиянинг жануби-шарқида бир неча соат ичида иккита кучли зилзила содир бўлиб, унинг оқибатида 40 мингдан ортиқ одам ҳалок бўлди. Эрдўғон, ўз навбатида, мухолифатнинг кескин танқидига учради, бир қанча сиёсатчилар мамлакатнинг бундай йирик табиий офат билан курашишга тайёр эмаслигига ишора қилган.
Изоҳ (0)