Вайронкор зилзилалардан сўнг Туркия ҳукумати 341 кишини ҳибсга олди — улар биноларни қуриш вақтидаги талончилик ва қоидабузарликларда айбланмоқда, деб хабар берди TRT Haber.
Зилзиладан жабр кўрган 11 вилоятда қулаган ёки шикастланган бинолар бўйича олиб борилган Бош прокуратура текширувлари натижасида 564 кишининг қурилишдаги қоидабузарликлари аниқланиб, 160 нафари қўлга олинган, яна 132 нафарини қўлга олиш ёки қамаш учун ордер берилган.
282 киши талончиликда айбланиб, улардан 181 нафари ҳибсга олинган.
Туркия президенти Ражаб Тоййиб Эрдўғоннинг сўзларига кўра, зилзиладан жабр кўрган ҳудудларда қурилиш ишлари март ойида бошланади. 11 вилоятда — Адана, Адияман, Диярбакир, Газиантеп, Хатай, Қаҳраманмараш, Килис, Малатя, Османия, Шанлиурфа ва Элязиғда 200 мингга яқин турар жой бинолари қурилиши режалаштирилган.
Эрдўғон зилзила зоналарида бизнес ва инвестицияларни қўллаб-қувватлаш учун жами 20 миллиард турк лираси (1 миллиард доллар) миқдорида ёрдам кўрсатилишини ва кредит кафолат жамғармаси ҳажмини 250 миллиард лирадан (13,2 миллиард доллар) 350 миллиардга (18,5 миллиард доллар) оширишни маълум қилди.
“Уй-жой, иш ўринлари, саноат, қишлоқ хўжалиги, тарихий ва маданий қадриятлари бўлган барча шаҳарларимиз тўлиқ тикланади. Янги бинолар уч ёки тўрт қаватдан баланд бўлмайди”, — деб тушунтирди у.
Шу орада Истанбул мэри Экрем Имомағлу метрополиядаги қулаш хавфи энг юқори деб таснифланаётган уйларни бузиш бошланганини эълон қилди.
Февраль ойи бошидан бери Туркияда бир нечта кучли зилзилалар содир бўлди. Биринчи кучли зилзила юз берган 6 февралдан бери 7 000 дан ортиқ ер силкинишлари қайд этилган. 20 февраль оқшомида Туркиянинг жануби-шарқида, Хатайда иккита янги зилзила юз берди.
Жаҳон соғлиқни сақлаш ташкилоти (ЖССТ) маълумотларига кўра, зилзиладан жабрланганларнинг умумий сони 23 миллион кишини ташкил этади. Иқтисодий зарар, дастлабки маълумотларга кўра, 20 миллиард доллардан ошган.
Изоҳ (0)