“Дарё” нашри 23 февралда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Украинага замонавий Ғарб қирувчилари берилмайдими?
Украина Россия ҳудудига зарба бериш учун Ғарб самолётлари ва узоқ масофали қуроллардан фойдаланмасликка кафолат бера оладими?
Бу саволга Украина ташқи ишлар вазири Дмитрий Кулеба Sky News телеканалига берган интервьюсида жавоб берди.
“Биз Ғарб қуролларидан Украина ҳудудларини озод қилиш учун фойдаланишга кафолат беришимиз мумкин”, — дейди Кулеба.
Ғарб давлатлари январь ойида Киевга реактив қирувчи самолётлар етказиб бериш масаласини муҳокама қила бошлаган. Украина президенти Владимир Зеленский уларнинг етказилишига эришишга ваъда берган.
Ҳозирда бу ғояни Болтиқбўйи мамлакатлари қўллаб-қувватламоқда, деб ёзади Politico.
“Бундай қарор қабул қилиш осон бўлмайди”, — дейди Польша президенти Анжей Дуда. Германия канцлери Олаф Шолс эса Ғарб қирувчиларининг юборилишини рад этиб, бу мавзу муҳокамасини тўхтатишга чақирган.
Айни вазиятда АҚШ ҳам Киевга жанговар самолётлар билан ёрдам ваъда қилишдан бош тортди, аммо учинчи давлатлардан бирортаси ёрдам бермоқчи бўлса, Америка буни мамнуният билан қабул қилади, дея таъкидлаган Оқ уй.
Буюк Британия мудофаа вазири Бен Уоллеснинг айтишича, Украина Россия билан уруш тугаганидан кейингина замонавий Ғарб қирувчиларини олиши мумкин. У буни Киевнинг ғарбий ҳамкорлари ўртасидаги консенсус деб атади.
Араб давлатлари Наблусдаги фаластинликларнинг ўлдирилишини қоралаб чиқди
Араб давлатлари Исроил армиясининг фаластинликларга қарши уюштирган жазо рейдини қоралаб чиқди.
Саудия Арабистони, Қатар, Бирлашган Араб Амирликлари, Кувайт, Уммон, Миср, Тунис давлатлари Исроил армиясининг Наблусдаги ҳаракатларини қоралади — рейдда 11 фаластинлик ҳалок бўлган, 100 дан ортиқ киши яраланган.
Араб парламенти, Араб давлатлари лигаси ва Форс кўрфазидаги араб давлатлари ҳамкорлик кенгаши Исроилни халқаро ҳуқуқни қўпол равишда бузганликда ва Фаластин ҳудудларида кескинликни кучайтирганликда айблади.
22 февраль куни Исроил мудофаа кучлари оккупация қилинган Ғарбий соҳил шимолидаги Наблус шаҳрида навбатдаги рейд давомида фаластинликларга қарши қурол ишлатди ва бу босқин яна одамлар ўлимига сабаб бўлди. Исроил ҳарбийлари шаҳарга бир неча томондан бостириб келган. Улар эски шаҳар ҳудудидаги уйлардан бирини ўраб олгач, тартибсизликлар бошланган.
Туркиядаги зилзиладан сўнг айбдорлар ҳибсга олинмоқда, вайрон бўлган шаҳарлар қанча муддатда тиклана олади?
Зилзилалардан сўнг Туркия ҳукумати 341 кишини ҳибсга олди — улар биноларни қуриш вақтидаги талончилик ва қоидабузарликларда айбланмоқда, деб хабар берди TRT Haber.
Зилзиладан жабр кўрган 11 вилоятда олиб борилган текширувлари натижасида 564 кишининг қурилишдаги қоидабузарликлари аниқланиб, 160 нафари қўлга олинган.
282 киши эса талончиликда айбланмоқда, ҳозирда улардан 181 нафари ҳибсга олинган.
Туркия президенти Ражаб Тоййиб Эрдўғоннинг сўзларига кўра, зилзиладан жабр кўрган ҳудудларда қурилиш ишлари март ойида бошланади. 11 вилоятда 200 мингга яқин турар жой бинолари қурилиши режалаштирилган.
Эрдўғон зилзила зоналарида бизнес ва инвестицияларни қўллаб-қувватлаш учун жами 1 миллиард доллар миқдорида ёрдам кўрсатилишини ва кредит кафолат жамғармаси ҳажмини 13,2 миллиарддан 18,5 миллиард долларга оширишини маълум қилди.
“Уй-жой, иш ўринлари, саноат, қишлоқ хўжалиги, тарихий ва маданий қадриятлари бўлган барча шаҳарларимиз тўлиқ тикланади. Янги бинолар уч ёки тўрт қаватдан баланд бўлмайди”, — дея маълум қилган президент.
Шу орада Истанбул мэри Экрем Имомоғлу метрополиядаги қулаш хавфи энг юқори деб таснифланаётган уйларни бузиш бошланганини эълон қилди.
Ўзбекистонга таъсир қиладиган сув тошқинига қандай омил сабаб бўлмоқда?
Мутахассислар Тожикистондаги зилзила оқибатида Сарез кўли сув тошқинига сабаб бўлиши, бу эса Марказий Осиёнинг тўртта давлатига таъсир қилишини маълум қилди. Бу ҳақда Sputnik хабар бермоқда.
Маълум қилинишича, Сарез кўли яқинида 7,3 магнитудали зилзила қайд этилган. Ушбу жараёнда қурбонлар ва вайроналарнинг олди олинди, аммо сув омбори яқинидаги ҳудуд ўн йилдан ортиқ вақтдан бери мамлакатга таҳдид солмоқда.
Ҳозирда Сарез кўлининг чуқурлиги 500 метрга етади, умумий ҳажми эса 17 куб километрни ташкил этади.
Усой тўғонининг вайрон бўлишига олиб келиши мумкин бўлган зилзила ва кўчкилар “геологик қамоқхона”дан улкан ҳажмдаги сувнинг сизиб чиқишига олиб келади. Москва давлат университети механика институтининг ҳисоб-китобларига кўра, оқибатда баландлиги 150 метргача бўлган сел 3 километрдан ортиқ баландликдан чиқиб кетади. Водийларда тўлқин баландлиги 15 метрга тушади, бу уч қаватли уйнинг баландлигига тенг. Мазкур фавқулодда ҳолат нафақат Тожикистон, балки Ўзбекистон, Қирғизистон ва Туркманистон ҳудудларига ҳам таъсир қилади.
Тожикистон бу масалани бошқача ҳал қилишга, яъни Сарез кўлидаги ичимлик сувини хорижга сотишга қарор қилди. Ўнлаб давлатлар билан музокаралар олиб борилди, бироқ фақат Хитой келишувга рози бўлди.
Ҳозирда Сарез кўли тун-у кун кузатув остида. Мутахассислар сув омборидаги ҳар қандай ўзгаришларни кузатиб боради. Сабаби сув сатҳи кескин ўзгарган тақдирда, дарҳол тревога эълон қилиниши керак.
Изоҳ (0)