Туркия президенти Ражаб Тоййиб Эрдўғон мамлакат армияси Суриядаги курд террорчилари фаолиятига барҳам беришга қарор қилганини билдирди.
Унинг таъкидлашича, ушбу ташкилотлар ё қуролларини топширишлари ёки йўқ қилиниши керак.
“Биз Суриядаги террорчилик ташкилотларини, айниқса, ҳар икки мамлакат мавжудлигига таҳдид солаётган ИШИД ва Курдистон ишчи партиясини йўқ қилишга қатъий ният қилганмиз. Бу сепаратист жиноятчилар ё қуролларини топширади, ё улар билан бирга Сурия ерларига кўмилади. Биз ва курд биродарларимиз ўртасида қонли ғов яратишга уринаётган террорчилик ташкилотини тугатамиз”, деди Эрдоғон парламентда Адолат ва тараққиёт партияси фракцияси олдида сўзлаган нутқида.
Унинг таъкидлашича, Суриядаги мазкур гуруҳлар “Сурия, шунингдек, Ироқ ва Туркия учун таҳдид манбайи ҳисобланади”.
“НАТОнинг уларга қарши курашаётган ягона аъзоси — Туркия. Бу ишда бизни чеклаб бўлмайди. Ягона мақсадимиз — минтақамизнинг Суриядан бошлаб ҳар бир нуқтасида тинчлик, осойишталик ва барқарорликни таъминлашдан иборат. Бошқалар учун Сурия хавфсизлиги ва осойишталиги муҳим бўлмаслиги мумкин. Биз эса бундай ўйлашга қодир эмасмиз, чунки Сурия билан 900 километрлик чегарамиз бор”, деди Эрдўғон.
У, шунингдек, юртига қайтиб кетмоқчи бўлган Туркиядаги суриялик қочқинларга ёрдам беришини, аммо ҳеч кимни куч билан мамлакатдан чиқариб юбормаслигини таъкидлади.
Изоҳ (0)