Тошкент вилояти Экология, атроф-муҳитни муҳофаза қилиш ва иқлим ўзгариши бошқармаси Янгийўл туман бўлими давлат инспекторларига нисбатан хизмат вақтида номаълум шахслар томонидан безорилик ҳаракатлари содир этилди. Бу ҳақда Экология вазирлиги хабар берди.
Маълум қилинишича, 4 январь куни Янгийўл тумани, “Самарқанд” МФЙ ҳудудида туман экология бўлими бошлиғи А.Н. ҳамда бош мутахассис А.Ж. рейд тадбирларини олиб бораётган пайтда 4 нафар номаълум шахс “Жигули” машинасида уларнинг йўлини тўсган.
Ходимлар ўзларини таништириш мақсадида хизмат гувоҳномаларини тақдим этган вақтда ҳуқуқбузарлар уларга ташланиб, турли тан жароҳатлари етказган ва кийимларини яроқсиз ҳолатга келтирган.
Инспекторларга Янгийўл тумани марказий шифохонасида биринчи тиббий ёрдам кўрсатилган. Уларнинг аҳволи ўрта даражада дея баҳоланмоқда.
Ҳозирда ушбу ҳолат Янгийўл тумани ИИБ томонидан ўрганилмоқда.
2024 йилнинг июлида Самарқандда профилактика инспекторини урган шахсларга нисбатан жиноят иши қўзғатилиб, қамоққа олинганди.
Изоҳ (0)