Нукус шаҳри ҳокимлиги қора марварид рангли Kia K5 Style автомобилини харид қилди. Бу давлат харидлари портали маълумотларида келтирилган. Шартнома 23 декабрь куни тузилган бўлиб, автомобилнинг нархи 492 млн сўмни ташкил этади.
Автомобильни сотиб олишга шаҳар ҳокимининг 23 декабрдаги фармойиши асос қилиб олинган.
Ушбу фармойиш Адлия вазирлигининг “E-qaror” ягона электрон тизими платформасида ҳужжат мазмунида шахсга доир маълумотлар, васийлик ва ҳомийлик ёки амалдаги қонунчиликка мувофиқ бошқа турдаги фойдаланиши чекланган ахборот мавжудлиги важи билан яшириб қўйилган.
Давлат харидлари электрон тизимига бириктирилган фармойиш нусхасида мавжуд маълумотларга кўра, маблағ ер участкаларига бўлган ҳуқуқларни сотишдан тушган пуллар ҳисобидан шаҳар ҳокимлигига ажратилган маблағга сотиб олиниши белгиланган.
Сотиб олиш учун асос сифатида шаҳар ҳокимлиги балансида бўлган Malibu-2 автомашинаси 2018 йилда ишлаб чиқарилгани, бугунги кунда эскириб, сақлаш ва таъмирлаш харажатлари учун кўп миқдорда маблағ сарфланаётгани билдирилган.
Шунингдек, фармойишда Malibu-2 автомобилини белгиланган тартибда аукцион орқали сотувга чиқариш назарда тутилган. Ваҳоланки, ҳокимликнинг автотранспорт воситаларига тақиқ қўйилган.
Боиси МИБдан ҳокимликнинг 6 та ижро ҳужжатлари бўйича жами 3 миллиард 14 миллион 975 минг сўм қарздорлиги мавжуд.
Изоҳ (0)