17 май куни Хитой Халқ Республикасининг Сиан шаҳрида Ўзбекистон – Хитой бизнес-форуми бўлиб ўтди. Унда Хитойнинг 400 дан ортиқ йирик компаниялари вакиллари иштирок этди. Форум давомида қатор келишувлар ва шартномалар имзоланди. Шу билан бирга турли соҳаларда муҳокамалар ҳам ўтказилди.
Ўзбекистон транспорт вазири Илҳом Маҳкамов форумда эришилган келишувлар хусусида интервью берди.
— Ўзбекистон — Қирғизистон — Хитой темирйўл лойиҳаси ҳақида гапирсангиз...
— Бугунги кунда Хитой дунёдаги энг йирик товар ишлаб чиқарувчига айланган. Дунёнинг кўплаб мамлакатларига Хитой ўз маҳсулотларини экспорт импорт қилади.
Бу жиҳатда Ўзбекистоннинг энг асосий рўлини кучайтириш мақсадида Ўзбекистон орқали Хитойга келаётган маҳсулотларга мамлакатимиз транзит, яъни кўприк бўлиб бериши асосий мақсад. Ҳозирда Хитойнинг қатор транспорт логистика компаниялари билан шартномаларни имзолаяпмиз. Бу компаниялар нафақат Ўзбекистон орқали маҳсулотларини айирбошлаш ёки транспорт хизматларини республикамиз орқали кўрсатади, балки қўшма корхоналар тузиб, Ўзбекистон Республикаси ҳудудида логистика марказларини яратади. Бу чегараолди логистика марказлари бўлади.
“Ўзбекистон темир йўллари”нинг Хитойдаги қатор ташкилотлар билан қўшма корхонаси тузилиб, логистика марказларидан ташқари, контейнерлаштириладиган ташувларни амалга оширади. Қирғизистон орқали юк айланмасини амалга оширишдан асосий мақсад ҳозир йирик лойиҳанинг устида турибмиз. Мана бугун Хитой темир йўллари қошидаги биринчи лойиҳа институти билан биз техник иқтисодий асосларни якунладик. Бугун хитойлик ва қирғиз ҳамкасбларимиз билан кейинги қадамларга қандай ўтиш бўйича алоҳида “йўл харита”ларига қўл қўямиз.
Хитойда транспорт тизими жуда яхши ривожланган. Шу жиҳатдан темир йўл, автомобиль йўллари қурилишида Хитой компанияларини Ўзбекистонга жалб қилиш ва Ўзбекистонда мавжуд лойиҳаларда уларни тендерларда иштирок этиш бўйича муҳокамалар олиб борилмоқда.
— Бугунги келишувлар ва натижаларни ўзбекистонликлар ўз ҳаётларида қачондан сезишни бошлайди?
— Мен ўйлайманки, Хитой билан ҳамкорликни ҳамюртларимиз аллақачон сезишни бошлашган. Республикамизда қурилаётган камида иккита йирик магистрал йўлларимизда Хитой компаниялари иштирок этишган.
Бундан ташқари, темир йўл соҳасида поезд вагонларини ишлаб чиқариш бўйича ҳам муҳокамалар бўлмоқда. Бугунги кунда юк вагонларига эҳтиёжимиз мавжуд. Юк айланмаси ошгани сайин, вагонларга эҳтиёж бўлгани учун Хитойнинг йирик компанияси билан Ўзбекистонда қўшма корхона қилиб, юк вагонларини ишлаб чиқариш бўйича шартнома имзоладик.
— Жорий йилнинг ўзида пойтахтга 1000 та автобус олиб келиниши режа қилинган. Умуман олганда Хитой элекромобил соҳасида яхши ривожланган. Бу соҳа бўйича ҳам келишувларга эришилмоқдами?
— Ҳақиқатанам Тошкент шаҳрига 1000 та автобус олиб келиниши бўйича келишувимиз бор. Бугунги кунда пойтахтга 600 та автобус келтирилди, қолган 400 таси ҳам май ойи охиригача етиб келади.
Бундан ташқари, биз вилоят марказларига ҳам автобусларни харид қилишимиз лозим. Шу боис ҳам Хитойнинг йирик компаниялари билан ушбу маҳсулотни ишлаб чиқаришни давом эттиришни келишяпмиз. Энг асосийси, диллерлар орқали эмас, “иккинчи қўл” орқали эмас, балки тўғридан-тўғри сотиш бўйича келишувлар амалга оширилмоқда. Тўғридан-тўғри дегани ўз нархида сотиш.
Бундан ташқари, “Yutong” компанияси автобусларини Ўзбекистонда ишлаб чиқариш бўйича келишувлар бўлмоқда.
— Қайси ҳудудларга шундай автобуслар етказилиши режа қилинган?
— Дастлабкиси, бугунги кунда Самарқанддаги ЕТТБнинг саммитида 6 та автобуснинг тақдимоти бўлиб ўтди. Булар 2 ой ичида яна 100 та олинади, Нукус шаҳрига яна 100 та олинади.
Изоҳ (0)