Қорақалпоғистон Республикаси Жўқорғи Кенгеси 882,8 миллион сўмга Toyota Prado сотиб олди. Бу ҳақда Давлат харидлари порталидаги маълумотларда келтирилган.
Лот рақами 1809329 бўлган харид Қорақалпоғистон Республикаси Жўқорғи Кенгеси томонидан 2020 йилнинг ноябрь ойида амалга оширилган бўлиб, буюртма Нукус шаҳрига етказиб берилиши керак бўлган.
Шунингдек, ушбу портал маълумотларига кўра, Жўқорғи Кенгес бундан икки йил олдин — 2018 йилнинг декабрида ҳам Toyota Prado-200 харид қилган. Ўшанда ушбу харид 886 миллион сўмга тушган.
Аввалроқ Давлат активларини бошқариш агентлиги ижтимоий тармоқда кенг жамоатчилик томонидан билдирилаётган фикрларни инобатга олган ҳолда Қорақалпоғистон Республикаси ҳудудий бошқармаси учун Trailblazer автомобилини сотиб олиш фикридан қайтган эди.
Эслатиб ўтамиз, ноябрь бошида Зарбдор тумани ҳокими Зафар Рўзиев Captiva хизмат машинаси бўла туриб, 370 миллион сўмга Trailblazer, шунингдек, пандемия даврида Учқўрғон, Поп, Қўшработ ва Нарпай туманлари ҳокимликлари ҳам Trailblazer сотиб олгани тўғрисида хабар берилганди. Денов тумани ҳокимлиги эса карантин кучайтирилган пайтда — 2020 йилнинг июлида 398 миллион сўмга Trailblazer LTZ-АТ, Наманган вилояти ҳокимлиги ҳам июлда бюджет маблағлари ҳисобидан 1 миллиард 579 миллион сўмга Toyota LC200 автомобилини ҳамда сентябрь ойида қарийб 400 миллион сўмга Trailblazer LTZ-АТ русумли автомобиль харид қилган.Бундан ташқари, Мирзачўл тумани ҳокимлиги 370 миллион сўмга Trailblazer, Қашқадарё вилояти ҳокимлиги ҳоким ўринбосарига 349 миллион сўмга Equinox, ҳокимнинг хотин-қизлар масалалари бўйича маслаҳатчисига, ёрдамчиси ҳамда ишлар бошқармаси бошлиғига 621 миллион сўмга 3 та Tracker хизмат машиналари сотиб олган.
Коррупцияга қарши курашиш агентлиги директори Акмал Бурҳонов мансабдор шахслар пандемия шароитида давлат маблағларининг самарали сарфланиши нақадар муҳим эканлигини тўла англаб етмаётгани, қиммат нархлардаги хизмат автотранспортларини харид қилинаётганига муносабат ҳам билдирган. Шунингдек, Президентнинг янги қарорига кўра, туман ҳокимларига нархи 267,5 миллион сўмдан юқори хизмат автомобили сотиб олиш тақиқланиши мумкинлиги маълум қилинганди.
Изоҳ (0)