Вазирлар Маҳкамасининг жорий йил 14 июлдаги қарорига мувофиқ юридик шахслар учун табиий газ ва электроэнергия учун тарифлар оширилиши вақтинчалик тўхтатилганди. Шунга қарамай, ижтимоий тармоқларда айрим газ қуйиш шохобчаларида 15 июлдан бошлаб метан нархи оширилгани ҳақидаги хабарлар тарқалди.
«Дарё» мухбирлари ҳудудлардаги газ қуйиш шохобчаларида бўлиб, нарх-наво билан боғлиқ ҳолатни ўрганди.
Наманган
Намангандаги автомобилларга газ тўлдириш компрессор шохобчаларида (АГТКШ) нарх-наво ўзгаргани йўқ. Бу ҳақда «Дарё» мухбири Азизбек Абдувалиев хабар бермоқда.
Наманган шаҳридаги газ тўлдириш шохобчаларининг айримларида 2700 сўм нарх белгиланган. Шу билан бирга, 2600 сўм ва 2800 сўмдан сотаётганлари ҳам бор. Бу шохобчанинг жойлашган ўрни ва тадбиркорлик субъектларининг нарх сиёсатига боғлиқ.
«Шу ҳақдаги гап-сўзлар пайдо бўлганидан сўнг ўзим бир қанча шохобчаларга бориб келдим. Туманлар билан боғланиб, нарх-наво билан қизиқдим. Ҳолат ўзгармаган, шохобчаларда 2600—2800 сўм атрофида газ тўлдиришяпти», — дейди «Ҳудудгаз Наманган» газ таъминоти филиали директорининг биринчи ўринбосари Ўткирбек Мамадалиев.
Маълумот учун, бугунги кунда Наманган шаҳрида 27 та, вилоят бўйича эса жами 115 та автомобилларга газ тўлдириш компрессор шохобчаси фаолият кўрсатмоқда.
Бухоро
«Ҳудудгаз Бухоро» газ таъминоти филиали ахборот хизмати раҳбарининг «Дарё»га билдиришича, вилоят бўйича жами 73 та автомобилларга газ тўлдириш компрессор шохобчаси мавжуд бўлиб, ҳаммаси тўлиқ фаолият олиб бормоқда. Мазкур АГТКШларида нархлар бир хил, яъни 1 куб газ 2600 сўмдан сотилмоқда.
Вилоятда метан газ танқислиги кузатилмаган, лекин бензин етишмовчилиги мавжуд.
«Вилоятнинг Бухоро шаҳридан бошқа ҳудудларида бензин сотилмаяпти. Бухоро шаҳридаги шохобчалардан биридан бугун 5 литр А-80 бензини харид қилдим. Бензини сифатсиз чиқди. Автомашинамнинг юришида муаммолар туғилди. Мажбурликдан метан газ қуйдим. Нархи ўзгармаган, 2600 сўмдан олдим»,— дейди когонлик Аваз Аҳмедов.
Ҳаёт Давлатов эса бир неча кундан буён шахсий автомобилидан фойдаланмаётганини билдирган.
«А-91 бензини йўқлиги боис ишга таксида қатнаяпман. Автомобилим русумига на А-80, на метан газ тўғри келади»,— дейди у.
Андижон
«Дарё» мухбири Умиджон Мамарасуловнинг маълум қилишича, Андижон вилоятидаги газ қуйиш шохобчаларида метан нархи 2800 сўмдан сотилишда давом этмоқда.
«Вазирлар Маҳкамаси қарорига асосан газ нархи 15 июлдан ошиши керак эди. Аммо белгиланган муддат яқин қолганда оширмаслик тавсия этилиб, қарор ижросини таъминлаш тўхтатилди. Айни пайтда бизнинг шохобчамиздаги нарх ўзгармасдан 2800 сўм ҳолатда қолмоқда», — дейди исмини айтишни истамаган газ қуйиш шохобчаларидан бирининг иш бошқарувчиси.
Шу билан бирга, Андижон—Хонобод автомобиль йўлида газ қуйиш шохобчаларининг айримлари акция ўтказишни бошлашган. Ушбу шохобчаларда метан нархи 2300 сўмгача туширилган.
Фарғона
«Дарё»нинг Фарғонадаги мухбирининг билдиришича, вилоятда метан газ нархлари ўзгармаган, фақат жойлашган ҳудудларига қараб фарқлар мавжуд. Айни пайтда вилоятдаги шохобчаларда нарх 2300 сўмдан 2600 сўмгача белгиланганини кузатиш мумкин.Қорақалпоғистон
Қорақалпоғистонда ҳам шундай манзарани кўриш мумкин. Бу ердаги метан газ қуйиш шохобчаларида нарх кўтарилмаган, бироқ ҳудудларда турлича нарх белгиланган. Айтайлик, Тўрткўл туманидаги шохобчаларида 1 куб метр метан газ 2200—2400 сўм бўлса, Амударёда 2400—2500, Нукус шаҳрида 2500—2600, Қўнғиротда эса 2500—2700 сўмдан иборат.Маълумот учун, Монополияга қарши курашиш қўмитаси мутасаддиларининг билдиришича, метан газ нархлари доимий мониторинг қилиб борилмоқда ва автомобилларга газ қуйиш шохобчалари метан гази нархларини сунъий равишда оширган тақдирда белгиланган тартибда тегишли чора кўрилади.
Мавзуга доир:
Изоҳ (0)