«Тошкент ҳокими қарғиши кўпчиликка ёққан бўлса, Самарқанд ҳокими учун ёзилган шоҳона дастурхон кўпчиликни ўйлантирди». «Дарё»да якунланган ҳафта дайжести

Якунланган ҳафта ўзбекистонлик ҳокимлар, вазирлар билан боғлиқ шов-шувларга бой ҳафта бўлди. Тошкент вилояти ҳокими Зоир Мирзаев фуқаролар учун навбатдаги сайёр қабулида ҳокимлар қабулига кириб, бақир-чақир қилаётган, шунингдек бир муаммо юзасидан бир неча маротаба ҳоким қабулида бўлиб, ноқонуний талаб қўяётган, талаби рад этилгач, ҳокимлар ишламаяпти дея бонг урувчиларга мурожаат қилди. Ҳамда ҳокимлар ёмон, ҳокимлар ишламаяпти дегувчиларнинг фарзанди ҳам ҳоким бўлишини, ўшанда унинг онаси ёки отаси ҳокимларга қийин эканини ҳис қилишини тилади.

Мен қўлимдан келадиган ишни қиламан, дейман. Қўлимдан келмаса, шу заҳоти рад қиламан. Шу сабаб бир масала юзасидан менинг ёнимга эллик маротаба келиш шартмас. Бир муаммони қайтаряпсиз, биз йўқ деб рад қиляпмиз, яна шу муаммони айтиб, барчанинг вақтини олманг. Ҳамма нарсанинг ҳам қонуний ечими бор. Ҳеч ким ўзини артистликка солмасин, — дейди Зоир Мирзаев.

Шунингдек, Зоир Мирзаев ҳокимлар ёмон, улар ҳеч қандай иш қилмаяпти, дегувчилар ҳам борлигини эслатиб, уларнинг фарзандлари ҳоким бўлишини тилаган.

Ҳокимларни ёмон дейишади. Тўғри, балки ёмондирмиз. Шунинг учун ҳам эрталабдан кечгача елиб-югуряпмиз. Қўлимиздан келганча ҳаракатдамиз. Ҳокимлар ёмон дегувчиларнинг фарзандлари ҳам ҳоким бўлсин, эртага ишдан толиқиб, икки кишига ёрдам беролмай, уйга келганда унинг юзига қараб, ҳокимлар иши қанчалик машаққатли эканини ҳис қилинг, — дейди Тошкент вилояти ҳокими.

Самарқанд вилояти ҳокими Эркинжон Турдимов бошчилигидаги делегациянинг Қорақалпоғистонга ташрифи пайтидаги кечки овқати республика бюджети учун салкам 88 миллион сўмга тушган.Самарқанд вилояти ҳокимлиги ахборот хизмати раҳбари Манучеҳр Мирзаевнинг «Дарё»га билдиришича, Эркинжон Турдимов бошчилигидаги делегация вакилларининг Нукус туманига сафари давомида вилоят томонидан 250 га яқин жамоатчилик вакиллари иштирок этган. Мазкур санадаги тадбирлар доирасида Нукус туманининг 12 та ҳудуди (10 та маҳалла, истироҳат боғи ва Самарқанд ош маркази)да самарқандликлар томонидан ош дамланиб, тушлик ташкил этилган.Қорақалпоғистон Вазирлар кенгаши ахборот хизмати эса мазкур мақолага раддия билдириб, 87 миллион 907 минг сўм пулнинг барчаси овқат учун сарфланмаганини билдирди.

Қарорда кўрсатилган харажатларнинг барчаси овқатланиш учун сарфланмаган ва бунда овқатланишда на Самарқанд вилояти ҳокими Э.Турдимов, на Вазирлар кенгашининг раиси Қ.Сариев қатнашган. Яъни, қарорда умумий қилиб келтириб ўтилган, негизида овқатланиши учун 42 миллион 570 минг сўм, саҳна безаклари учун 19 миллион 337 минг сўм, лед экранлари учун 12 миллион, транспорт воситалари учун 14 миллион сўм харажатлари ишлатилган, — дейилади Вазирлар кенгаши ахборот хизмати хабарида.

Вазирлар кенгаши ахборот хизмати, шунингдек, мақолани чиқаришдан аввал чуқур ўрганишни, Самарқанд ва Қароқалпоғистон халқлари ўртасида хафагарчилик ҳиссини уйғотиши кузатилаётганини таъкидлаган.

Ижтимоий тармоқларда Маданият вазирлиги томонидан 15 миллиард 514 миллион 900 минг сўмга 2 та махсус автомобиль харид қилингани хабар берилди.

Мазкур хабар жамоатчилик муҳокамасига сабаб бўлмоқда. Боиси аввалроқ молия вазири Тимур Ишметов Самарқанд шаҳрида бўлиб ўтган иқтисодий форумда Ўзбекистон иқтисодиёти қийин босқичда харажатларни камайтирайлик деганди.

Вазирлик ахборот хизмати раҳбари Орифжон Файзиевнинг «Дарё»га маълумот беришича, мазкур харид президент қароридан келиб чиққан ҳолда амалга оширилган.

Айтилишича, Ўзбекистон Республикаси президентининг «Маданият ва санъат соҳасини янада ривожлантиришга доир қўшимча чора-тадбирлар тўғрисида«ги 2022 йил 2 февралдаги қарорига асосан 2022 йил учун календарь режада белгиланган тадбирлар ижросини самарали ташкил этиш мақсадида 2022 йил 1 июнга қадар «Маданият карвони» учун мўлжалланган, тегишли мусиқа техникаси ва саҳнага эга 2 дона махсус автотранспорт воситасини харид қилиш вазифаси белгиланган.

Мазкур қарордан келиб чиққан ҳолда харид қилинадиган «Маданият карвони» учун мўлжалланган, тегишли мусиқа техникаси ва саҳнага эга махсус автотранспорт (трансформер) воситасининг техник параметрлари мутахассислар томонидан белгиланган тартибда ишлаб чиқилди. Бундай замонавий автотранспорт воситасини тайёрлаш имконияти бўйича хорижий давлатлар ўрганилди ва энг маъқули сифатида Хитой давлати танланиб, вазирлик томонидан ОМДМ ва Huayuan компанияси билан музокара олиб борилди. Музокара хулосасига кўра, ОМДМ компанияси томонидан 873 минг доллар, Олмаота шаҳридаги Kazakhstan musical technologies филиали томонидан 900 026 доллар таклифи (битта махсус автотранспорт воситаси хариди учун) билдирилган.

Бироқ хорижий компаниялар пандемия сабабли махсус автотранспорт воситаси йил якунига қадар етказиб берилишини маълум қилган. Шундан сўнг, Маданият вазирлиги ишлаб чиқилган техник параметрлар асосида махсус автотранспорт (трансформер) воситасини тайёрлаш имконияти мавжуд бўлган (аниқ муддати ва бошқа маълумотлар) маҳаллий корхоналар билан мулоқот олиб бориш ҳамда тегишли хулоса олиш мақсадида «Ўзавтосаноат» АЖ, UzAvto Trailer МЧЖ ва JV MAN Auto-Uzbekistan МЧЖ қўшма корхонасига мурожаат этди.

JV MAN Auto-Uzbekistan МЧЖ қўшма корхонаси тавсияси асосида СТEYА Overseas projects томонидан 1 390 000 евро, Турин политехника университети (Ўзбекистон Республикаси президентининг 2021 йил 1—2 июнь кунлари Сурхондарё вилоятига қилган ташрифида берган топшириғига асосан, Сурхондарё вилояти учун тажриба сифатида кичик ҳажмдаги, мусиқа техникаси ва саҳнага эга махсус транспорт воситасини илк маротаба ишлаб чиқарган) томонидан 9 580 050 000 сўм ҳисобига махсус автотранспорт воситасини тайёрлаш, қолган корхоналар ва Uz Truck and Bus Motors МЧЖ томонидан эса 1 394 950 000 сўмга транспортнинг фақат бош қисми билан таъминлаш имконияти маълум қилинган, — дейилади вазирлик изоҳида.

Ўзбекистондаги метан заправкаларда ўрнатилган чеклов сабаб республиканинг кўплаб ҳудудида турнақатор навбатлар, юк автомобиллари билан боғлиқ ҳолатларда эса муаммолар юзага келмоқда.

«Дарё» мухбирлари ҳудудлардаги метан заправкаларда бўлиб, юзага келган ҳолатни ўрганди.