Ислом дунёси мамлакатлари ўзаро савдо, инвестиция, молиялаштириш ва ҳамкорликни ривожлантириш имкониятларидан максимал даражада фойдаланишлари керак. Бу ҳақда Туркия президенти Ражаб Тоййиб Эрдўғон Истанбулда ўтказилаётган Ислом иқтисодиёти бўйича 2-Жаҳон саммитида сўзлаган нутқида ма`лум қилди.
Эрдўғоннинг сўзларига кўра, мусулмонлар дунё аҳолисининг 25 фоизини ташкил қилса-да, исломий молия секторининг улуши 2,5 триллион доллардан ошмайди. Шу билан бирга, Ислом ҳамкорлик ташкилотига аъзо 57 мамлакат дунё аҳолисининг 25 фоизини ташкил этиб, глобал савдонинг атиги 11 фоизини ва жаҳон иқтисодиётининг 9 фоизидан камроғини назорат қилмоқда.
“Бу рақамлар ислом дунёси ўз салоҳиятини тўлиқ рўёбга чиқармаётганини кўрсатади”, деди Туркия раҳбари.
Унинг таъкидлашича, ислом мамлакатлари савдо, сармоя, ҳамкорлик ва молияни имкон қадар ривожлантириши зарур.
Туркия давлат раҳбарининг айтишича, саммит нуфузли иштирокчиларни бирлаштиради, улар исломий молия ахлоқидан тортиб стратегик режалаштириш, исломий ўсиш моделлари, ФинТеч технологиялари ва ҳалол иқтисодиёт стандартларигача бўлган асосий масалаларни муҳокама қилади. Унинг сўзларига кўра, бу муҳокамалар ислом оламини кўзланган мақсадларга яқинлаштиради.
“Туркия ҳар доим маданиятлар ва халқлар ўртасидаги кўприк сифатидаги масъулиятини англаган ҳолда ҳаракат қилган. Биз Истанбул марказли ислом молиясини ривожлантиришга катта эътибор қаратамиз. Истанбул молия маркази доирасида бошланган ташаббуслар ҳам глобал иқтисодиётга интеграциялашувга, ҳам исломий қадриятларни ҳимоя қиладиган модел яратишга йўналтирилган”, дейди Эрдўғон.
Туркия президенти замонавий глобал иқтисодиёт боши берк кўчага кириб қолганини таъкидлаган.
“Истеъмол ва фойдани максималлаштиришга асосланган жаҳон тизими инсоний қадриятларни иккинчи ўринга суриб қўяди, тенгсизликни чуқурлаштиради ва ишлаб чиқаришсиз ўсишни рағбатлантиради. У асосий муаммоларни ҳал қилмайди, фақат уларни вақтинчалик чоралар билан яширади. Унинг ҳозирги кўринишда давом этиши мумкин эмаслигини тобора кўпроқ экспертлар тан олмоқда”, дейди Туркия президенти.
Эрдўғонннинг қўшимча қилишича, адолат, бирдамлик ва хавф-хатарларни тақсимлашга эътибор қаратадиган ислом иқтисодиёти муқобил ечимни таклиф қила олади. Бироқ унинг сўзларига кўра, бу йўналишдаги салоҳият ҳали етарли даражада амалга оширилмаган.
“Барча рағбатлантиришларимизга қарамай, Туркияда ислом банклари улуши 8,1 фоиз даражасида қолмоқда. Биз бу кўрсаткични етарли эмас деб ҳисоблаймиз”, деб таъкидлади Эрдўғон.
Туркия президенти глобал иқтисодиёт савдо урушлари ва геосиёсий хавф-хатарлардан тортиб, аҳолининг кексайиши ва иқлим таҳдидларигача бўлган кўплаб муаммоларга дуч келаётганини эслатиб ўтган.
Изоҳ (0)