Россия Украинага қарши урушда миллионга яқин ҳарбий хизматчисини йўқотди. Бу ҳақда Украина Қуролли кучлари бош штаби маълум қилди.
Украина ҳалок бўлганлар ёки ярадорлар сонига аниқлик киритмаган, аммо юқоридаги рақам барча йўқотишларни ўз ичига олади: ҳалок бўлганлар, ярадорлар, бедарак йўқолганлар ва асирга олинганлар. Украина расмийлари уруш бошланганидан бери Россия қўшинлари ва техникасининг йўқотишларини кунлик кузатиб бормоқда. Томонлар ўз йўқотишларини расман эълон қилмаяпти.
Февраль ойида Украина президенти Владимир Зеленский уруш бошланганидан бери жанг майдонида 46 мингдан ортиқ украиналик аскар ҳалок бўлганини айтганди. 380 мингга яқин украиналик аскар яраланган, “ўн минглаб” аскарлар эса бедарак йўқолган ёки Россия асирлигида қолмоқда.
2024 йил охирида Россия мудофаа вазири ўринбосари Анна Сивилева бедарак йўқолган аскарларнинг қариндошларидан ДНК-тест ўтказиш учун 48 мингта ариза олинганини айтганди. Украина ҳарбийлари Россия ёзда янги ҳужумга тайёргарлик кўраётганини прогноз қилмоқда. Украинанинг бир неча вилоятлари орқали 1000 километрдан ортиқ масофага чўзилган фронт чизиғи бўйлаб жанговар ҳаракатлар фаоллашган.
Американинг “Урушни ўрганиш институти” таҳлилий маркази таъкидлашича, Москва бир неча ойдан бери Донецк вилоятининг Киев назорати остида қолган қисмини эгаллашга интилмоқда. Бу Россиянинг 2014 йилда Украинага илк бор бостириб кирганидан бери унинг асосий стратегик мақсадларидан бири бўлиб келмоқда.
Изоҳ (0)