Сурхондарё вилоятидаги Сариосиё аэропорти 30 май куни илк рейсни қабул қилди. Бу ҳақда Uzbekistan Airports хабар берди.
Маълум қилинишича, Тошкентдан бортида 48 нафар йўловчи билан учган самолёт соат 15:41 да аэропортга келиб қўнди. Тошкент–Сариосиё–Тошкент мунтазам қатновлар ҳафтасига икки марта – чоршанба ва жума кунлари амалга оширилиши режалаштирилган.
Аэропортда аэродромнинг сунъий юзаларида, яъни учиш-қўниш йўлаги, бурилиш йўлакчаси ва самолётлар учун туриш жойларида капитал таъмирлаш ишлари олиб борилди. Ушбу реконструкция ишларидан сўнг аэропорт 29 апрель куни биринчи техник парвозни қабул қилди.
Бир ой ичида 1100 квадрат метр майдон ва соатига 100 нафаргача йўловчига хизмат кўрсатиш қувватига эга янги терминал қуриш бўйича барча ишлар якунланди.
Маълумот учун, Сариосиё аэропорти 1995 йилда фуқаро авиацияси учун ёпилган бўлса, орадан 30 йил ўтиб яна йўловчиларни қабул қила бошлади.
Бугунга қадар Мўйноқ, Қўқон, Шаҳрисабз ва Зомин аэропортлари реконструкция қилиниб, фойдаланишга топширилган эди.
Изоҳ (0)