Туркиялик актёр Керем Бурсин Голливуд киноларида рол ижро этиши мумкин. “Қалбим эшигини қоқ” сериали юлдузи май ойининг бошида янги шартномалар билан танишиш мақсадида яширинча Лос Анжелесга жўнаб кетди. Бу ҳақда туркиялик журналист Меҳмет Юстюндаг хабар берди.
Маълум бўлишича, актёр АҚШга оиласини зиёрат қилиш учун эмас, балки икки продюсер ҳамда ўз вакиллари билан учрашиш учун борган. Унга бир нечта шартномалар таклиф қилинган, улардан бири тест режимида суратга олиш ишларини ҳам ўз ичига олади.
Эслатиб ўтамиз, Керем Бурсин фаолиятининг дастлабки йилларида ҳам Голливудда ишлашни орзу қилган. У Туркияда машҳурликка эришишидан аввал АҚШда бир нечта фильмларда (бюджети кам бўлган) суратга тушган. Бугунги кунга келиб эса хорижда ҳам таниқли актёрга айланган. Унинг “Мовий ғор” номли фильми узоқ вақт давомида энг кўп муҳокама қилинган турк лойиҳаларидан бири бўлиб қолган.
Агар янги лойиҳалар муваффақиятли кечса, Бурсин яқин келажакда Голливуднинг етакчи актёрлари билан бир экранда намоён бўлиши мумкин.
Маълумот учун, Шотландия, Малайзия, АҚШда яшаб, Америкада актёрлик фаолиятини бошлаган Керем Бурсин “Қуёшни кутиш” сериалида рол ўйнаб, Туркияда машҳурликка эришди. Шундан сўнг Керем 17 та лойиҳада суратга тушди. Унинг иштирокидаги “Қалбим эшигини қоқ” сериали актёрнинг дунё бўйлаб машҳурликка эришишига сабаб бўлди. Ҳозирда реклама шартномаларидан Туркияда энг катта даромад оладиган актёр Гупсе Озай билан биргаликда “Платоник севги” сериали устида ишлаб келмоқда.
Изоҳ (0)