Кениянинг ғарбидаги Кисуму вилоятида 8 август куни кечқурун содир бўлган йўл-транспорт ҳодисаси оқибатида камида 25 киши вафот этди. Бу ҳақда Daily Nation хабар бермоқда.
Нянза вилояти йўл ҳаракати хавфсизлиги бошқармаси бошлиғи Питер Майнанинг маълум қилишича, қурбонлар дафн маросимига бораётган мактаб автобусидаги йўловчилар бўлган. Транспорт воситаси Кисуму айланма йўлида ҳалокатга учраган ва ағдарилган.
Майнанинг айтишича, AIC Naki High School мактабига тегишли автобус маҳаллий вақт билан соат 17:00 атрофида Какамегадан Кисуму томон кетаётганда фалокат юз берган.
Таъкидланишича, ҳайдовчи айланма йўлга яқинлашганда юқори тезликда транспорт воситасини бошқара олмай қолиб, қарама-қарши йўналишга чиқиб кетган ва ариққа қулаб тушган.
“Ҳалок бўлганлар орасида 10 нафар аёл, 10 нафар эркак ва бир нафар саккиз ойлик қизалоқ бор. Авария сабаблари ҳозирда ўрганилмоқда”, деди Питер Майна воқеа жойида журналистларга.
Шунингдек, у беш киши оғир тан жароҳати олиб, даволанаётганини, яна 15 киши, жумладан бир бола енгил жароҳатланганини қўшимча қилган.
Кения ва бутун Шарқий Африка минтақасида йўл-транспорт ҳодисалари тез-тез учрайди. Бу ҳудудларда йўллар асосан тор, йўл қопламаси ёмон аҳволда ва кўплаб чуқурларга эга.
Ҳуқуқ-тартибот идоралари ходимлари кўпинча ҳайдовчиларни тезлик оширишда айблашади.
Изоҳ (0)