Бутун дунёда коронавирусга чалинганлар сони 224 700 982 кишини ташкил қилмоқда. Жонс Ҳопкинс университети маълумотларига қараганда, 4 631 626 киши вирус оқибатида вафот этган. Шунингдек, 3,5 миллиарддан ортиқ дозада коронавирусга қарши вакциналар қўлланилган.
Касалланганлар сони бўйича АҚШ (40,9 миллион), Ҳиндистон (33,2 миллион), Бразилия (20,9 миллион), Россия (7 миллион) ва Франция (6,9 миллион) энг олдинда бормоқда.
Финляндиянинг Тампере университети Вакциналарни ўрганиш маркази коронавирусга қарши вакцинани синовдан ўтказиш учун 6 ойликдан 12 ёшгача бўлган болаларни танлаб олмоқда. Лойиҳа Pfizer компанияси томонидан ишлаб чиқилган. Тадқиқот, шунингдек, Испания, Польша ва АҚШда ҳам ўтказилади.
«Тадқиқотда қатнашиш учун 12 ёшгача бўлган соғлом болалар танлаб олинади, уларда иммунитетни пасайтирувчи касалликлар, болалар ва ўсмирлардаги мултитизимли шамоллаш синдроми ёки вакциналарга аллергияли реакция бўлмаслиги керак», — дейилади марказ хабарида.
Тадқиқотдан кейин дорининг қўлланилиши Европа дори воситалари агентлиги томонидан маъқулланиши керак. Шундан сўнг аҳолининг ушбу гуруҳини эмлашга келаси йил бошида киришилиши мумкин. 12 ёш ва ундан катта ўсмирларни эмлаш эса Финляндияда августда бошланган.
Мавзуга доир: Финляндия коронавируснинг янги штаммлари туфайли сайёҳларнинг мамлакатга ташрифини чеклаб қўйди
Биринчи дозани олганлар сони аҳолининг эмланадиган қисмининг 71,1 фоизини ташкил қилмоқда. Иккинчи дозани эса 59,2 фоизи олишга улгурган.
Қозоғистон карантин чораларини юмшатмоқда. 13 сентябрдан бошлаб юзма-юз учрашувларга, дам олиш кунлари жамоат транспорти ишлашига, миллий терма жамоалари ва клуб жамоалари машғулотларига рухсат берилди. Бундан ташқари, бутун мамлакат бўйлаб масжидлар ҳовлиларида жума намозларини ўқиш мумкин бўлди.
Айни вақтда, эмланмаган фуқаролар аввалгидек, дам олиш кунлари савдо-кўнгилочар марказларга киритилмайди. Сўнгги бир кеча-кундузда мамлакатда 3959 кишида коронавирус аниқланган.
Мавзуга доир: Қозоғистондан 28 августдан карантин юмшатилади
«Биз вакцинация паспортини фақат паспорт олиш учунгина киритишимиз керак эмас. Ушбу режалар бекор қилинишини эълон қилишдан хурсандман», — деди Буюк Британия соғлиқни сақлаш вазири Сажида Жавида.
Вакцинация паспортларини жорий қилиш режаси ой охирида кучга кириши керак эди. Клублар ёки оммавий тадбирларга кириш учун COVID-19 га қарши эмланганликни тасдиқловчи ҳужжат, коронавирусга нисбатан манфий натижали тест ёки мусбат ПЗР-тестдан кейин ўз-ўзини яккалаш муддати тугаганлигини тасдиқловчи маълумотномани кўрсатиш керак бўлиши тахмин қилинганди.
Ҳукуматдагилар айтишича, бундай паспортларни жорий қилиш имконияти захирадаги вариант сифатида қолади. Айни пайтда Шотландияда вакцинация паспортлари 1 октябрдан киритилади.
Буюк Британияда бутун пандемия даврида 7,19 миллион киши коронавирусга чалинган. Британияликларнинг 48,39 миллион нафари вакцинанинг биринчи дозасини олган.
Мавзуга доир: Англияда COVID-19 га чалиниш ҳолатлари ортганига қарамай 19 июлдан карантин чекловлари бекор қилинади
Грузия ССВ маълумотларига қараганда, августнинг иккинчи ярмида касалланиш ҳолатлари сони бир кунда 5000—6000 атрофида бўлган. Ўтган ҳафта ушбу кўрсаткич уч баробар пасайган, ўтган бир кеча-кундузда эса мамлакатда 946 кишида вирус аниқланган. COVID-19 оқибатидаги ўлим даражаси мамлакатда юқори бўлиб қолмоқда, ўтган бир суткада 48 бемор вафот этган.
Пандемия бошидан буён мамлакатда 581 815 киши касалланиб, шуларнинг 8233 нафари вафот этган.
Изоҳ (0)