Ўзбекистон ташқи ишлар вазири Абдулазиз Комилов 24 сентябрь, сешанба куни Нью-Йоркда Ҳиндистон ташқи ишлар вазири Субраҳманям Жаишанкар билан учрашди, дея хабар бермоқда ТИВ матбуот хизмати.
Хабар беришларича, икки мамлакат ташқи сиёсат идоралари раҳбарлари сиёсат, савдо-иқтисодий, инвестиция, маданий-гуманитар ва бошқа соҳалардаги ҳамкорликнинг устувор масалалари бўйича фикр алмашган.
Ўзбекистон ва Ҳиндистон етакчиларининг мунтазам мулоқоти натижасида икки томонлама муносабатларда кузатилаётган янгича шиддат мамнуният билан қайд этилган.
Суҳбатда товарлар ва хизматларни ўзаро етказиб бериш номенклатурасини кенгайтириш, савдо айланмаси ҳажмларини ошириш, қўшма инвестиция лойиҳаларини амалга оширишга урғу берган ҳолда ҳамкорликнинг иқтисодий блоки масалаларига алоҳида эътибор қаратилган.
Турли даражадаги бўлажак Ўзбекистон—Ҳиндистон учрашувларининг жадвали ва кун тартиби кўриб чиқилди. «Учрашувда халқаро ташкилотлар доирасидаги ҳамкорлик ҳамда халқаро ва минтақавий хавфсизликни таъминлаш соҳасидаги шерикчилик масалалари ҳам муҳокама қилинди», — дейилади ТИВ ахборотида.
Изоҳ (0)