Жомбой туманида жойлашган оилавий шифокорлик пункти ичимлик суви тармоғидан ўзбошимчалик билан фойдаланаётгани аниқланган. Бу ҳақда Қурилиш ва уй-жой коммунал хўжалиги вазирлиги ахборот хизмати маълум қилди.
Айтилишича, Қурилиш ва уй-жой коммунал хўжалиги соҳасида ҳудудий назорат қилиш инспекцияси ва “Самарқанд сув таъминоти” АЖ ходимлари ҳамкорликда сув тармоғига ўзбошимчалик билан уланиш ҳолатларини аниқлаш бўйича Жомбой туманида рейд тадбири ўтказилган.
Туманнинг “Холвойи” МФЙ ҳудудида жойлашган “Чалақўрғон” оилавий шифокорлик пункти ичимлик суви тармоғидан ўзбошимчалик билан фойдаланаётгани ҳамда сув ҳисоблагич ускунаси рўйхатдан ўтказилмагани ва муҳрланмаганлиги аниқланди.
Қўшимча қилинишича, ушбу қоидабузарлик юзасидан ташкилот масъулларига маъмурий баённомалар расмийлаштирилиб, ҳолатлар инспекция ходимлари томонидан жойида бартараф этилмоқда.
Қонунчиликка кўра, ичимлик суви таъминоти ва оқова сувларни чиқариб юбориш соҳасидаги етказилган зарарнинг ўрни Ўзбекистон Республикаси “Ичимлик суви таъминоти ва оқова сувларни чиқариб юбориш тўғрисида”ги қонунига асосан қопланади.
Изоҳ (0)