“Тоштурма”да кунига 4-6 соат сув берилаётгани ҳақидаги хабар юзасидан изоҳ берилди

Халқ тилида “Тоштурма” номи билан танилган қамоқхонада кунига атиги 4-6 соат давомида сув берилаётгани ҳақида хабар берилган эди. Ундай айтилишича, ИИВ ҳузуридаги ЖИЭД Марказий тергов ҳибсхонасида сақланаётган маҳбусларда шу кунларда муассасада сув таъминотида жиддий узилишлар бўлаётганидан, хусусан, суткасига атига 4-6 соат давомида сув берилаётганидан оммавий норозилик кайфияти юзага келган.

Ҳолат юзасидан ИИВ ахборот хизмати раҳбари Шоҳрух Ғиёсовнинг изоҳ беришича, мазкур ахборот ҳақиқатга тўғри келмайди.

ИИВ Жазони ижро этиш департаменти тасарруфидаги муассасалардаги ҳолат назорат қилувчи органлар ва тегишли маъсуллар томонидан доимий равишда ўрганиб борилади, деди Шоҳрух Ғиёсов.

Мазкур масала юзасидан Олий Мажлиснинг инсон ҳуқуқлари бўйича вакили (омбудсман)нинг ишонч рақамига қўнғироқ қилиб, боғланишнинг имкони бўлмади.

Аввалроқ Бухоро вилоятидаги қамоқхонада маҳбуслар нос киритилмаслигидан шикоят қилган эди.