Ўзбекистонлик аёл Африкада тоза ичимлик суви чиқаришга ҳомийлик қилгани ҳақида хабарлар тарқалди.
Ижтимоий тармоқларда унинг бир гуруҳ африкаликлар қуршовида ўтиргани, уларнинг айримлари аёл учун рақсга тушиб бераётгани акс этган видео оммалашди.
Маълумотларга кўра, Тошкент вилоятининг Оҳангарон шаҳрида яшовчи Дилбар Алимхўжаева “Темир ота” ошхонаси раҳбари сифатида машҳур. Бизнесини бозорда манти сотишдан бошлаган аёл ҳозирда йирик тадбиркорлардан бири. У меҳмонхона, ошхона ва тўйхоналар бўйича ўз бизнесига асос солди.
ЮНИСЕФ маълумотларига кўра, Африка давлатларидаги 190 миллион нафар боланинг ҳаёти ва соғлиғи тоза сув етишмаслиги сабаб хавф остида. Бенин, Буркина-Фасо, Камерун, Чад, Кот-д’Ивуар, Гвинея, Мали, Нигер, Нигерия ва Сомалидаги болаларда бу айниқса юқори.
Юқоридаги мамлакатлардаги болаларнинг деярли учдан бирининг уйида сув йўқ, учдан икки қисми асосий санитария хизматларидан фойдаланиш имкониятига эга эмас. Ҳар тўрт боланинг бири эса оддий ҳожатхоналар ҳам бўлмаган шароитда яшайди. Уларнинг аксарият қисмида ҳатто қўлларни совунлаб ювиш имкони ҳам йўқ.
Африкада тоза ичимлик суви чиқаришга ёрдам бергани айтилаётган аёл айнан қайси давлатда буни амалга оширганини аниқлашнинг ҳозирча имкони бўлмади.
Изоҳ (0)