Олий Мажлис Қонунчилик палатасида 21 ноябрь куни бўлиб ўтган мажлисда депутат Жаҳонгир Мамажонов сув хўжалиги вазирига январдан бошлаб ерости сувларидан фойдаланганлик учун тўловлар жорий қилиниши ҳақида савол билан мурожаат қилди.
Келаётган январь ойидан бошлаб ерости сувларидан фойдаланганлик учун тўловлар жорий қилиниши ҳақида турли хабарлар тарқалмоқда.
Ҳақиқатан ҳам, бугунги кунда аҳоли ўзининг шахсий томорқасидан қудуқ қазиб ёки бошқа йўл билан сув чиқарган. Эртага, 1 январь санасидан бунга тўлов жорий этиладими?, — дея савол берди депутат Жаҳонгир Мамажонов.
Сув хўжалиги вазири Шавкат Ҳамроев депутатнинг саволига жавоб берар экан, аввалдан ерости сувлари бўйича солиқ жорий этилганини эслатиб ўтди.
Агар ер сатхидан кунига 50 куб метргача сув олинаётган бўлса, бунда солиқ ундириш назарда тутилмаган. Катта миқдорда сув олинаётган бўлса, бу қаттиқ назоратда бўлади.
Оддий аҳоли фойдаланадиган “качалка” ёки бошқа усулда хонадон истеъмоли учун ер остидан сув олинса, бунга ҳеч қандай тўлов олинмайди. Фақат катта майдонларни суғориш учун амал қилади ва сув солиғи сифатида олинади, — деди Шавкат Ҳамроев.
Эслатиб ўтамиз, 2024 йил 1 январдан бошлаб сувни ҳисобга олиш воситалари билан жиҳозланмаган ерости сув олиш иншоотларидан фойдаланиш тақиқланади (бундан жисмоний шахсларга шахсий ва хўжалик эҳтиёжлари учун якка тартибда суткасига 5 метр кубгача бўлган миқдорда ерости сувларини олиш мустасно).
Изоҳ (0)