Ижтимоий тармоқларда ЙПХ инспекторлари ва фуқаролар ўртасидаги тортишувли ҳолат акс этган видео тарқалиб, муҳокамаларга сабаб бўлмоқда. Мазкур ҳолат юзасидан Тошкент шаҳар ИИББ Йўл ҳаракати хавфсизлиги бошқармаси ахборот хизмати тушунтириш берди.
Айтилишича, 30 октябрь куни соат 23:45 ларда Яккасарой тумани Муқимий ва Шоҳжаҳон кўчалари чорраҳасида 31 ёшли ҳайдовчи бошқарувида бўлган Nexia-3 русумли транспорт воситаси ва 25 ёшли шахс бошқарувида бўлган Lacetti русумли транспорт воситалари ўртасида йўл-транспорт ҳодисаси содир бўлган. ЙТҲ натижасида тан жароҳат олганлар йўқ.
Йўл-транспорт ҳодисаси содир бўлгандан сўнг ҳайдовчилар ўртасида ўзаро тортишув юзага келган. Ушбу ҳолатни кўрган ЙПХ инспекторлари безорилик ҳолатини тўхтатиш, жамоат тартибини сақлаш ва фуқаролар хавфсизлигини таъминлаш мақсадида зудлик билан ўз хизмат вазифасига киришишган. Бироқ ҳайдовчилар ИИО ходимларининг қонуний талабларини бажармасдан, уларга фаол қаршилик кўрсатган, дейилади Йўл ҳаракати хавсизлиги бошқармаси ахборотида.
Қўшимча қилинишича, мазкур ҳолат юзасидан текширув ўтказилмоқда, якуни бўйича қонуний қарор қабул қилиниши таъминланади.
Изоҳ (0)