АҚШ президенти маъмурияти Гарвард университетини исроиллик ва яҳудий талабаларнинг фуқаролик ҳуқуқларини бузганликда айблади. Бу ҳақда BBC хабар берди.
Ушбу айблов университетнинг федерал молиялаштирилишини янада хавф остига қўйиши мумкин. Гарвардга юборилган ҳукумат мактубида университет “ўзини таҳдид остида ҳис қилган яҳудий талабаларга атайлаб бефарқлик қилганлик”да айбланган.
Гарвард ва Оқ уй ўртасидаги муносабатлар сўнгги бир неча ой ичида кескинлашган. Университетга кўра, у дискриминацияга қарши курашда “сезиларли қадамлар” қўйган ва ҳукуматнинг айбловларига “мутлақо қўшилмайди”.
Мактубга кўра, “тегишли ўзгаришларни дарҳол жорий этмаслик Гарвард учун барча федерал молиявий ресурсларни йўқотишга олиб келади”.
“Гарвард, албатта, федерал имтиёзларсиз ишлашда давом этиши мумкин. Эҳтимол, бундай имконият Гарварднинг яна гуллаб-яшнашига ёрдам беради”, дейди университет президенти.
Федерал терговчилар яҳудий талабаларнинг кўпчилиги дискриминацияга учрагани ҳақида хабар берган. Уларнинг тўртдан бир қисми жисмоний таҳдидга дуч келгани айтилган. Ушбу хатти-ҳаракатлар орасида яҳудий талабаларга тупуриш ва калтаклаш ҳолатлари ҳам бор.
“Гарварднинг фуқаролик ҳуқуқларини бузиш билан боғлиқ ҳаракатлари университетни эгаллаб олган демографик иерархиянинг яққол намунасидир. Унинг ирқий иерархияга содиқлиги антисемитизмнинг кучайишига имкон берди”, дейилади мактубда.
Оқ уйда чиқиш қилган матбуот котиби Каролин Ливитт 30 июнь куни маъмурият ва Гарвард ўртасидаги музокаралар “ёпиқ эшиклар ортида” давом этаётганини билдирган.
Май ойида маъмурият АҚШ федерал агентликларига молиялаштиришни тугатиш ёки қайта тақсимлаш учун Гарвард университети грантларини қайта кўриб чиқишни буюрган эди. Маъмурият умумий қиймати 100 миллион фунт стерлинг бўлган 30 га яқин шартномани кўриб чиқишини айтганди.
Ҳукумат аллақачон 2,65 миллиард долларлик федерал грантларни музлатиб қўйган ва Гарвардни халқаро талабаларни қабул қилиш имкониятидан маҳрум қилишга уринганди.
Изоҳ (0)