Копенгаген полицияси швед экофаоли Грета Тунбергни Копенгаген университетидаги намойиш пайтида ҳибсга олди. Бу ҳақда Ekstra Bladet нашри хабар бермоқда.
Тунберг ўзининг Instagram саҳифасида Исроил университетлари билан ҳамкорликка қарши уюштирилган намойиш акс этган видеони жойлаштирган. Намойиш иштирокчилари Копенгаген университети музейи биносини эгаллаб олишди.
“Талабалар босқинга қарши ҳаракати” ва мен Копенгаген университети маъмурияти биносидамиз”, деб ёзди у ва полиция намойишчиларни тарқатиб юбораётганини қўшимча қилди.
Копенгаген университети синагога жойлашган Кристаллгаде кўчасида жойлашган. Нашрнинг ёзишича, полиция бинодан бир неча кишини қўлига кишан таққан ҳолда олиб чиқиб кетган.
“Талабалар босқинга қарши” ҳаракати ўз баёнотида Копенгаген университети музейи биносини эгаллаб олишганини маълум қилган. Намойишчилар университетдан Исроил университетлари билан ҳамкорликни тўхтатишни талаб қилмоқда.
Грета Тунберг — иқлим ўзгариши инсоният учун экзистенсиал инқирозни юзага келтиради деган фикрни илгари сургани учун халқаро миқёсда шуҳрат қозонган ва эътирофга сазовор бўлган швед экофаоли.
У ўзининг тўғридан тўғри мулоқот услуби ва экологик муаммоларни ҳал қилиш учун етарли чоралар кўрмаётган сиёсий арбобларни кескин танқид қилиши билан машҳур.
2018 йил августида 15 ёшли Грета Швеция парламенти олдида “Иқлим учун мактабни ташлаш” шиори билан норозилик намойишини бошлади ва экологик муаммоларга қарши зудлик билан курашишга чақирди. Унинг ҳаракатлари бутун дунё бўйлаб акс-садо бериб, оммавий тадбирларни келтириб чиқарди.
Грета Тунгберг ўша йили БМТнинг иқлим ўзгариши бўйича конференциясида нутқ сўзлаган.
Изоҳ (0)