Украинага янги ракета ҳужумлари содир бўлган тақдирда фойдаланиш учун 4 мингдан ортиқ «бузилмас пунктлар» — уяли алоқа, интернет, электр ва иссиқлик таъминоти билан жиҳозланган нуқталар тайёрлаб қўйилди. Бу ҳақда Украина президенти Владимир Зеленский ўз видеомурожаатида маълум қилди.
«Аҳолини қўллаб-қувватлаш бўйича янги «Бузилмас пунктлар» лойиҳамизни бутун мамлакат бўйлаб ҳам жорий қилмоқдамиз. Шу куннинг натижаси ўлароқ, 4 мингдан ортиқ ана шундай пункт тайёрланди. Яна кўп ишлар режалаштирилган», — деди Зеленский.
Украина президенти шунингдек, бундай пунктларда «асосий хизматлар»нинг барчаси — электр, сув, иссиқлик, биринчи тиббий ёрдам қутиси, мобил алоқа ва «кечаю-кундуз ишловчи мутлақо бепул» интернет мавжуд бўлишини таъкидлади. Бу пунктлар мактаблар, шифохоналар, вилоят ва туман ҳокимликлари қошида ишлайди. Зеленский украиналиклар «ҳар қандай сценарийга» тайёр туриши кераклигини қўшимча қилди.
15 ноябрь куни Россия Мудофаа вазирлиги Украина инфратузилмасига йирик ракета ҳужуми уюштирди. Украина Энергетика вазирлиги раҳбари Герман Галушенко буни уруш бошланганидан бери энг зарба деб атади. Украина ички ишлар вазири Денис Монастирский эса 30 га яқин инфратузилма объекти зарар кўрганини қўшимча қилди.
18 ноябрь куни Зеленский 10 миллиондан ортиқ украиналик электр энергиясиз қолганини маълум қилди. Унинг аниқлик киритишича, энг қийин вазият Киев ва Винница, Одесса ва Суми вилоятларида кузатилмоқда.
Изоҳ (0)