АҚШ Мудофаа вазирлиги вакилининг маълум қилишича, АҚШ ҳарбий объектлари дронлар ва ракеталар зарбасига учраган. У бунда Эронга алоқадор гуруҳларни айблади.
АҚШ ва “Исломий давлат” террорчилик гуруҳига қарши курашаётган халқаро коалициянинг Сурия ва Ироқдаги ҳарбий базалари сўнгги бир ҳафта ичида 13 марта ҳужумга учраган, деди Пентагон матбуот котиби генерал Пат Райдер.
17 октябрдан 24 октябргача бўлган даврда аскарларга Ироқда камида 10 марта, Сурияда эса уч марта ракета ва дронлар билан зарбалар берилди, дейди у.
Генералнинг сўзларига кўра, ҳужумлар ортида “Ислом инқилоби қўриқчилари корпуси ва Эрон режимидан кўмак олаётган гуруҳлар” турибди. Ироқдаги исломий қаршилик гуруҳи ҳужумларнинг бир қисми учун жавобгарликни ўз зиммасига олди ва тегишли хабарларни Telegram’даги каналида эълон қилди.
АҚШ ИШИД террорчи ташкилотига қарши кураш мақсадида Сурияда 900 га яқин ва Ироқда 2500 га яқин аскарини жойлаштирган. АҚШ Исроилни қўллаб-қувватлашга ваъда берганидан сўнг Эронга алоқадорлиги айтиладиган турли қуролли гуруҳлар АҚШ ҳарбий объектларига ҳужум қилиш билан таҳдид қилди.
22 октябрь куни Америка Қўшма Штатлари минтақадаги иштироки кучайганини эълон қилди ва Эрон ва унинг иттифоқдош қуролли гуруҳларини Яқин Шарқдаги можарони кенгайтиришдан огоҳлантирди.
Изоҳ (0)