АҚШ қирувчилари Суриядаги икки объектга зарба берди

АҚШ мудофаа вазири Ллойд Остин президент Жо Байденнинг буйруғига биноан АҚШ ҳарбийлари Суриядаги нишонларга зарбалар берганини маълум қилди.

“Бугун президент Байденнинг кўрсатмаси билан АҚШ кучлари ўзини-ўзи мудофаа қилиш учун Сурия шарқида Эрон Ислом инқилоби посбонлари корпуси (ИРГК) ва унга алоқадор гуруҳлар томонидан фойдаланилаётган иккита объектга зарбалар берди”, — дейилади Остиннинг Пентагон томонидан эълон қилинган баёнотида.

Reuters ва AP агентликлари аниқлик киритишича, Американинг Ф-16 қирувчи самолётлари Суриядаги қурол ва ўқ-дорилар омборларини нишонга олган.

АҚШнинг юқори мартабали ҳарбий мулозими AP агентлигига айтишича, зарбалар Суриянинг Ироқ билан чегарадош Абу Камол шаҳри яқинида амалга оширилган. Ўша пайтда ҳарбий базада Эрон жангчилари ва ИРГК зобитлари бўлган; тинч аҳоли бўлмаган, аммо АҚШ қурбонлар ёки етказилган зарар ҳақида маълумотга эга эмас. 

Қайд этилишича, зарбалар Эрон томонидан қўллаб-қувватланган гуруҳлар томонидан Ироқ ва Суриядаги америкалик ходимларга уюштирилган қатор ҳужумларга жавоб бўлган.

“Зарбалар Исроил ва ҲАМАС ўртасида давом этаётган можарога алоқадор эмас”, — дея қўшимча қилди АҚШ Мудофаа вазири. “Президент учун америкалик ҳарбийларнинг хавфсизлигидан устунроқ нарса йўқ ва у Қўшма Штатлар бундай ҳужумларга тоқат қилмаслигини ҳамда ўзини, ходимларини ва манфаатларини ҳимоя қилишини тушунтириш учун бугунги ҳаракатларни амалга оширди”, — деди Остин.

Унинг сўзларига кўра, АҚШ можарога интилмаяпти ва кейинги ҳарбий ҳаракатларда иштирок этиш истаги ҳам йўқ.

Остин америкалик аскарларга қарши ҳужумлар қабул қилинмаслиги, улар тўхтатилиши кераклигини айтди.

“Агар Эроннинг ишончли вакиллари Америка қўшинларига ҳужум қилишда давом этса, биз халқимизни ҳимоя қилиш учун зарур чораларни кўришдан тортинмаймиз”, — дея сўзини якунлаган Пентагон раҳбари.

Шу ҳафта бошида “Ироқдаги исломий қаршилик” гуруҳи АҚШнинг Суриядаги иккита ҳарбий базасига уюштирилган ҳужумлар учун жавобгарликни ўз зиммасига олганди. Гап Ал-Омар нефть кони яқинидаги база ва Сурия шарқидаги база ҳақида бормоқда.