АҚШ мудофаа вазирлиги Сурия шимоли-шарқидаги нефть конларини ИШИД террорчилари ҳужумидан қўриқлаш мақсадида ҳудудга қўшимча кучлар ва ҳарбий воситаларини юборади. Бу ҳақда Пентагон матбуот хизмати хабар қилди, деб ёзган «ТАСС».
«АҚШ ‘Сурия демократик кучлари’ коалициясидаги иттифоқдошлари билан муносабатлардаги позициясини мустаҳкамлайди ва Сурия шимоли-шарқидаги нефть конларининг ИШИД террорчилари ёки бошқа беқарор субъектлар қўлига ўтиб кетишини олдини олиш мақсадида ҳудудга қўшимча ҳарбий кучларини юборади» – дейилган баёнотда.
Шунингдек, матбуот хизмати хабарида АҚШ ва унинг иттифоқдошларининг ИШИД билан курашда эришган энг катта ютуғи Сурия шарқидаги нефть конларининг яъни террорчиларнинг асосий даромад манбасининг эгаллаб олинганлиги экани таъкидланган.
Пентагон расмийлари террорчиларга қарши операция давом этиши ва ИШИД қайта пайдо бўлмаслиги учун нефть конларини яхши қўриқлаш лозимлигини қайд этган.
Аввал АҚШ давлат раҳбари Дональд Трамп ҳукуматнинг террорчиларнинг нефть конлари устидан назорат ўрнатишига йўл қўймаслиги ва уларни қўриқлашни Америка ҳарбийлари ихтиёрида қолдирилишини билдирган.
Мавзуга доир: «Сурия демократик кучлари» гуруҳининг вакили курд жангариларининг Туркия чегарасидан 32 км узоқликка чекинганини маълум қилди
17 октябрда АҚШ ҳамда Туркия расмийлари музокаралардан кейин Суриядаги урушни тўхататишни келишиб олди. Анқара «Тинчлик булоғи» ҳарбий операциясини «Сурия демократик кучлари» коалициясининг курд жангарилари ҳудудни тарк этиши учун 120 соатга тўхтатди.
22 октябрда Россия президенти Владимир Путин ҳамда Туркия етакчиси Ражаб Тоййиб Эрдўғон Сурия шимоли-шарқидги вазиятни муҳокама қилди. Олти ярим соат давом этган суҳбатдан кейин икки давлат раҳбари «Тинчлик булоғи»ни яна 150 соат давомида тўхтатиб туриш, ўт очмаслик режими бекор бўлгач Туркия чегарасининг 30 километр қисмидаги курдларни у ердан узоқлаштириш, қўшма патрул тадбирларини ўтказиш, чегараларда расмий Дамашқ томонидан 15 та пост жойлаштириш, Адана халқаро шартномасига амал қилиш юзасидан меморандум имзолади. АҚШ мудофаа вазири Майк Эспер Туркия Суриядаги вазиятни тартибга солишда Россия билан эмас, балки НАТО билан ҳамкорлик қилиши лозимлигини таъкидлаган. Эрон ташқи ишлар вазирлиги эса Путин ва Эрдўғоннинг Суриядаги вазият бўйича қарорини қўллаб-қувватлаган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)