АҚШ Суриядан қўшинларини олиб чиқиб кетмоқчи — ОАВ

АҚШ ўз қошинларини Суриядан тўлиқ олиб чиқиш масаласини кўриб чиқмоқда. Бу ҳақда Foreign Policy хабар берди.

Хабарга кўра, ҳозирча бу масала бўйича якуний қарор қабул қилингани йўқ, аммо Мудофаа вазирлиги ва Давлат департаментидаги манбалар Оқ уй миссия муддатини узайтиришдан энди манфаатдор эмаслигини айтган. Қўшинларнинг олиб чиқилиши “Исломий давлат” учун “совға” бўлади.

“Террорчи гуруҳ сезиларли даражада заифлашганига қарамай, агар имконият бўлса, Сурияда қайта тикланишга тайёр”, — дейилади хабарда.

Таъкидланишича, Сурияда 900 га яқин АҚШ аскари бор ва улар Сурия Демократик кучлари билан биргаликда мамлакат шимоли-шарқида “Исломий давлат” фаолиятини тўсишда муҳим рол ўйнайди.

• 24 январь куни Ироқ ва Сурияда жойлашган АҚШнинг учта ҳарбий базаси шиаларнинг “Ироқ исломий қаршилик ҳаракати” томонидан ҳужумга учради.
• Пентагон матбуот котиби Патрик Райдернинг 11 январь куни маълум қилишича, 2023 йил 17 октябрдан буён АҚШнинг Ироқ ва Суриядаги ҳарбий базаларига қилинган ҳужумлар сони 130 тага етган. Шундан 53 таси Ироқ ҳудудида, яна 77 таси Сурия ҳудудида содир этилган.
• Америка Исроилни урушда қўллаб-қувватлаши фонида унинг Яқин Шарқ давлатларида жойлашган базаларига ҳужумлар тез-тез содир бўлмоқда.