АҚШ Ҳарбий-ҳаво кучлари Сурия шимолидаги қурол-яроғ омборига, Исроил қўшинлари эса мамлакат жанубидаги нишонларга ҳужум уюштирди. Пентагон раҳбари Ллойд Остиннинг таъкидлашича, АҚШ Эрон ислом инқилоби муҳофизлари корпуси томонидан фойдаланиб келинган объектларга зарба берган. Бунинг фонида Американинг Сурия ва Ироқдаги базалари яна ҳужумга учраган, Яманда эса АҚШга тегишли дрон уриб туширилган.
Ҳужумни АҚШнинг иккита Ф-15 қирувчи самолёти амалга оширган. “Бу Ироқ ва Суриядаги америкаликларга уюштирилган ҳужумлар сериясига мудофаа мақсадларида амалга оширилган юқори аниқликдаги жавоб зарбаларидир”, — дейди Остин.
Пентагон раҳбарининг қайд этишича, АҚШ президентининг ўз фуқаролари хавфсизлигини таъминлашдан устуврроқ вазифаси йўқ ва у мазкур ҳаракати орқали мамлакат ўзи, ходимлари ва манфаатларини ҳимоя қилишини тушунтириб қўймоқчи.
Сурия инсон ҳуқуқуларига риоя қилинишини кузатиш мониторинг маркази маълумотларига кўра, АҚШ уюштирган ҳужум оқибатида 9 киши ҳалок бўлган.
Исроил эса Сурия жанубидаги “айрим ҳарбий позицияларга” авиазарбалар берган. Сурия Мудофаа вазирлиги “бир оз моддий зарар” етганини маълум қилди. Исроил томони ҳозирча ҳолатга изоҳ бермаган.
17 октябрдан 7 ноябрга қадар АҚШнинг Яқин Шарқдаги кучларига 40 мартадан ортиқ ҳужум уюштирилган. Ҳужумларнинг 20 дан ортиғи Ироқда, қолгани Сурияда юз берган.
Октябрь охирларида президент Жо Байденнинг буйруғига биноан АҚШ ҳарбийлари Суриядаги нишонларга зарбалар берганди. АҚШнинг юқори мартабали ҳарбий мулозими AP агентлигига айтишича, зарбалар Суриянинг Ироқ билан чегарадош Абу Камол шаҳри яқинида амалга оширилган. Ўша пайтда ҳарбий базада Эрон жангчилари ва ИРГК зобитлари бўлган; тинч аҳоли бўлмаган, аммо АҚШ қурбонлар ёки етказилган зарар ҳақида маълумотга эга эмас.
Изоҳ (0)