Буюк Британия Ливан расмийларини июнь ўрталарида Исроил ҳужуми содир бўлиши ҳақида огоҳлантирган. Бу ҳақда Ливан маҳаллий нашрларига асосланиб, Times of Israel хабар берди.
Манбада айтилишича, Британия хавфсизлик хизматлари Байрутдаги маъмуриятга ҳужум ҳақида маълум қилган. Июнь ўрталаридан содир бўлиши айтилган ҳужум қайси йўналишда ва қанча муддат давом этиши ҳақида маълумот мавжуд эмас.
Лондон расмийлари ҳужум “кенг кўламли” бўлишини хабар қилган. Ливан етакчиларига “уруш учун зарур шарт-шароитларни яратишни” тавсия қилган.
Ливандаги Al Axbor нашри Британия разведкаси Ливан ҳукуматига ҳужум ҳақида бир қанча маълумотлар топширганини ёзган. Ҳукумат фавқулодда вазият сабабли бу маълумотлар ҳақида ҳисобот бермаган.
Бир қанча Яқин Шарқ манбалари Исроил Ливан жанубида қуруқлик ҳужумлари уюштириши мумкинлигини ёзган. Бир гуруҳ сиёсий таҳлилчилар эса нишон Ливан пойтахти Байрут бўлиши мумкинлигидан хавотир билдирган.
АҚШ Исроил ва Ливан “Ҳизбуллоҳ”ини музокараларга қайтишга чақирган. Вашингтон расмийлари Исроил ва Ливан бир-бирига душман бўла олмаслиги, кескинлик фақат Исроил мудофаа кучлари ҳамда Ливан аҳолиси бир қисми манфаатларини ифода этувчи “Ҳизбуллоҳ” ўртасидагина юз бераётганини айтган.
Исроил ҳукумати ҳужум ҳақида тарқатилган хабарларга муносабат билдирмаган.
Изоҳ (0)