Пуэрто-Риконинг шимоли-ғарбида жойлашган Исабела ва Кебрадильяс шаҳарлари аҳолиси тўғон бузилганлиги сабаб эвакуация қилинмоқда. Бу ҳақда Сан-Хуан (Пуэрто-Рико пойтахти) миллий метеорологик хизмати (NWS) Twitter’да маълум қилди, деб хабар берди «РБК».
«Тўғон ишчилари маҳаллий вақт билан соат 21:00 да Гуахатака тўғони бузилганини ва Рио-Гуахатака дарёси оқимининг пастида жойлашган ҳудудлар сув остида қолиши мумкинлигини маълум қилди», — дейилади хабарда.
«Гуахатака дарёси бўйидаги барча ҳудудлар дарҳол эвакуация қилиниши керак. Сизнинг ҳаётингиз хавф остида!», — дейилади метеохизмат хабарида. Исабела ва Кебрадильяс шаҳарларида 70 мингга яқин одам истиқомат қилади.
Тўғонга 21 сентябрь куни ёпирилган «Мария» тўфони жиддий зарар етказган. Пуэрто-Рико фавқулодда вазиятлар бошқармаси вакилининг сўзларига кўра, «Мария» мамлакатни деярли «вайрон қилган». Шунингдек, тўфон бир нечта электр узатиш тармоқларига ҳам зарар етказган бўлиб, оролнинг бутун аҳолиси электр токисиз қолган.
Пуэрто-Рико губернатори Рикардо Росселлонинг маълум қилишича, электр узатиш тармоқларини таъмирлашга бир неча ой вақт кетади.
Изоҳ (0)