Афғонистонда тўғон қурилиши пайтида 100 га яқин одамнинг жасади топилди

Афғонистоннинг Хост вилоятида 100 га яқин жасаддан иборат оммавий қабр топилди. Бу ҳақда Tasnim news хабар берди.

“Толибон”нинг Хост вилоятидаги маҳаллий расмийлари ушбу вилоят марказида оммавий қабр топилганини эълон қилди. Мазкур оммавий қабрдан камида 100 нафар жасаднинг суяклари олиб чиқарилган. Топилма Хост вилояти марказидаги Сарбани ҳудудида кичик тўғон қурилиши вақтида аниқланган.

Расмийларга кўра, бу жойда дафн этилган одамлар 1979 йилда ўлдирилган, кейин эса оммавий қабрга кўмилган. Франция ахборот агентлиги “Толибон” расмийларига таяниб, оммавий қабр “Афғонистонда Совет Иттифоқи томонидан қўллаб-қувватланган ҳукумат даврига тегишли” деб хабар берди.

Дастлабки хулосалар шуни кўрсатадики, оммавий қабр 1979 йилдаги “Афғонистон Халқ Демократик партиясининг давлат тўнтариши”дан тахминан бир йил ўтиб, ушбу партиянинг 100 га яқин мухолифларини дафн этиш учун қазилган.

Манбаларга кўра, бу одамлар ўз кийимлари билан дафн этилган ва улар орасида аёллар ва болалар кийимлари ҳам борлиги айтилмоқда. Дастлабки маълумотларга кўра, улар отиб ўлдирилган.