Ижтимоий тармоқларда 14 январь оқшомида қўшни Тожикистон ҳудудида жойлашган Қайроққум сув омборида тўғон ёрилгани ҳақида миш-мишлар тарқалди. Кўп ўтмай Ўзбекистон Фавқулодда вазиятлар вазирлиги ушбу ахборот ёлғон ва ҳеч қандай асосга эга эмаслигини маълум қилди. Сув хўжалиги вазирлиги фуқароларни бу каби ёлғон миш-мишларга ишонмасликка ва хотиржамликка чақирди.
Сирдарё вилояти ҳокимлиги матбуот хизматининг маълум қилишича, вилоят ҳокими Ғофуржон Мирзаев фуқароларни тинчлантириш учун мазкур туманларга келган. У одамларни миш-мишларга ишонмасликка ва ваҳимага берилмасликка чақирган.
«Баҳри тожик» сув омборидаги гидроэлектр станцияси директори Файзулла Азизовнинг маълум қилишича, сув омборида ҳеч қандай муаммо йўқ, барча иншоотлар техник соз ҳолатда. Гидроэлектр станциясидаги агрегатлар одатдаги тартибда ишлаб турибди. Барча иншоотларнинг хавфсизлиги назоратга олинган. Сув омбори атрофидаги ҳудудларда яшовчи аҳоли саросимага тушиб, хавфсиз ҳудудларга кўчиб ўтаётгани ҳақидаги хабарлар ҳам асоссиз.
«Бугунги кунда Қайроққум сув омборининг сув ҳажми 3,443 миллиард куб метр бўлиб, сув омборига сувнинг кириши 892 м³/сония, сувнинг чиқиши эса 880 м³/сонияни ташкил этмоқда. Сув омборида охирги ўн кунлик давомида сув тўплаш ва сув чиқаришда ҳеч қандай кескин ўзгариш кузатилмаган», — дейилади хабарда.
Таъкидланишича, Ўзбекистон Сув хўжалиги вазирлигида кечаю кундуз фаолият юритадиган навбатчилик ташкил қилинган ҳамда диспетчерлик хизмати доимий ишлаб турибди. Шунингдек, республикадаги барча йирик сув иншоотларининг хавфсиз ишлаши яна бир бор назоратдан ўтказилган.
«‘Баҳри тожик’ сув омборининг сув ҳажми ўзгариши бўйича қўшни Тожикистон сув хўжалиги органлари, Ўзбекистон Фавқулодда вазиятлар вазирлиги ҳамда «Ўзгидромет» маркази билан мунтазам алоқалар ўрнатилган бўлиб, сув омборининг ишлаш режими бўйича ҳар соатлик мониторинг юритиб борилмоқда. Сув хўжалиги вазирлиги фуқароларни бу каби ёлғон миш-мишларга ишонмасликка ва хотиржамликка чақиради», — дея қайд этилади хабарда.
Маълумот учун, «Баҳри тожик» сув омбори сувидан Ўзбекистоннинг Тошкент вилояти Бекобод тумани, Сирдарё ва Жиззах вилоятлари ҳамда қўшни Қозоғистоннинг экин майдонларини суғоришда фойдаланилади.
Эслатиб ўтамиз, 2020 йилнинг 1 май куни Сирдарё вилоятида жойлашган Сардоба сув омборида тўғон ўпирилиши юз берди (тўғон 2010—2017 йилларда 1,2 триллион сўм эвазига қурилган). Ҳодиса оқибатида вилоятнинг Сардоба, Оқолтин ва Мирзаобод туманларидаги, шунингдек, Қозоғистоннинг Мақтаарал туманидаги аҳоли пунктлари ва экинларга зарар етди, бинолар, йўллар, коммуникациялар вайрон бўлди. Ҳодиса оқибатида, сўнгги маълумотларга кўра, олти киши ҳалок бўлган, 90 мингга яқин аҳоли эвакуация қилинган.
Дастлаб ҳодисага кучли ёмғир ва шамол сабаб бўлгани ҳақида тахминлар илгари сурилди, бироқ кейинроқ воқеа юз бериши арафасида кучли шамол ва ёғингарчилик кузатилмагани, ҳодисага лойиҳа ҳужжатларидаги, қурилишдаги ва эксплуатациядаги хато ва камчиликлар сабаб бўлгани маълум қилинди. Бош прокуратуранинг июль ойи охиридаги баёнотида иш бўйича қамоққа олинганини эълон қилди, кейинроқ октябрь ойида ишга 17 киши гумонланувчи сифатида жалб этилгани маълум бўлди.
Изоҳ (0)