Россиянинг Қозоғистон билан чегарадош Оренбург вилоятида тўғон ёрилиши оқибатида юзага келган сув тошқини туфайли 4 мингдан ортиқ фуқаро фавқулодда эвакуация қилинди. Бу ҳақда Al Jazeera нашри рус манбаларига таяниб, хабар бермоқда.
Расмийлар Урал дарёсидаги хавфли сув сатҳидан аҳолини огоҳлантирган. Тўғон бузилиши бўйича тергов ишларини бошланган.
Оренбург губернаторлигининг маълум қилишича, ҳозирга қадар 4208 киши, жумладан 1019 нафар бола хавфли зонадан эвакуация қилинган. Сув тошқинлари оқибатида 2500 дан ортиқ уй зарар кўрган.
Вилоят губернатори Денис Паслер сув тошқини ўзининг “чўққисига” етганини айтган. 230 минг аҳоли яшайдиган чегара шаҳар Орскда вазият оғир эканини маълум қилган.
Фавқулодда вазиятлар вазирлиги томонидан эълон қилинган видеотасвирларда аҳолига қутқарув жилетлари кийдирилиб, қутқарув қайиқларига тушишга ёрдам берилгани акс этган. Минглаб уйлар сув остида қолган, деб хабар бермоқда Россия ахборот агентликлари.
Россия ҳукумати, шунингдек, 2014 йилда қурилган тўғон ёрилиши юзасидан “бепарволик ва қурилиш хавфсизлиги қоидаларини бузиш” бўйича жиноий иш қўзғатган. Маҳаллий прокуратура тўғон техник хизмат кўрсатилмагани учун бузилганини маълум қилган.
Қозоғистон президенти Қосим-Жўмарт Тўқаев ҳам чегара яқинидаги вазият ҳақида муносабат билдирган. У сув тошқини сўнгги 80 йил давомидаги кўлами ва таъсири жиҳатидан Қозоғистонда ҳам энг йирик табиий офат бўлиши мумкинлигини маълум қилган.
Маълумот ўрнида, 5 апрель куни Россиянинг Оренбург вилояти ҳудудидан оқиб ўтувчи Урал дарёсида қурилган тўғонда ёрилиш содир бўлган эди. Мутахассислар бу ҳодисага кўп ёғингарчилик оқибатида дарё сувлари кўпайиши ва тўғонга босим ортиши сабаб бўлганини маълум қилган.
Изоҳ (0)