Бакалавр кириш имтиҳонида тўплаган балл билан тиббиёт техникумларини танлаш 28 августга қадар (шу куни ҳам) амалга оширилади. Бу ҳақда 20 август куни Олий таълим, фан ва инновациялар вазирлиги хабар берди.
Маълум қилинишича, Абу Али ибн Сино номидаги Жамоат саломатлиги техникумлари (тиббиёт техникумлари) ўрта ва ўрта махсус касбий таълим дастурларига кундузги таълим шакли бўйича кириш имтиҳонлари “аввал тест, сўнг танлов” тамойилига мувофиқ ўтказилади.
Бунда my.uzbmb.uz сайти орқали 5–25 июнь кунлари онлайн рўйхатдан ўтиб, кириш имтиҳонларида қатнашган абитуриентлар ўз хоҳишига кўра, тиббиёт техникумларига қабул танловида ҳам иштирок этиши мумкин.
Қабул қуйидаги кетма-кетликда амалга оширилади:
- Биология + кимё ёки кимё + биология асосий фан блокини танлаган абитуриентлар — жами тўплаган баллар бўйича.
- Асосий фанлар блокида биология ёки кимё бўлмаган абитуриентлар — мажбурий фанлар (она тили, математика, Ўзбекистон тарихи) бўйича тўплаган баллари асосида мутахассисликларни танлаши мумкин.
Тиббиёт техникумларини танлаш my.uzbmb.uz сайтида 28 август кунига қадар (шу куни ҳам) давом этади.
Абитуриентларнинг талабаликка тавсия этилган ёки этилмагани тўғрисидаги якуний танлов натижалари танлаш тўлиқ якунлангандан сўнг бир ҳафта муддатда эълон қилинади.
Тиббиётдан бошқа техникумларга қабул my.edu.uz платформаси орқали 2025 йил 10-сентябрьгача (шу куни ҳам) давом этади.
Саралаш имтиҳонлари кундузги ва кечки таълим шакллари учун ёзма имтиҳон шаклида белгиланган тартибда ўтказилади.
Маълумот учун, 2025/2026-ўқув йили учун умумий ўрта маълумот негизида 549 та техникумга жами 143 минг 114 та (шундан 66 минг 484 та давлат гранти) қабул параметрлари тасдиқланган. Шундан кундузги таълимга 102 минг 194 та (49 минг 234 та давлат гранти) ўрин ажратилган. Ўз навбатида кечки таълимга 2 минг 250 та, дуал таълим шаклига 38 минг 670 та (17 минг 250 та давлат гранти) квота берилган.
Изоҳ (0)